পেৰিছ অলিম্পিকৰ পৰা আহিছে এটাৰ পিছত আনটো বেয়া খবৰ। মল্লযুঁজাৰু বিনেশ ফোগাটক অতিৰিক্ত ওজনৰ বাবে অলিম্পকত অযোগ্য ঘোষণাৰ পিছতে আন এক অঘটন সংঘটিত হোৱাৰ খবৰ আহিছে।
ভাৰতীয় মল্লযুঁজাৰু অন্তিম পাঙ্গালক পেৰিছ অলিম্পিকৰ ভিলেজৰ পৰা বাহিৰ কৰি দিয়া হৈছে। অনুশাসন ভংগৰ অভিযোগত অন্তিম পাঙ্গালৰ লগতে সহযোগী ষ্টাফক পেৰিছ ত্যাগ কৰি স্বদেশলৈ উভতি অহাৰ নিৰ্দেশ দিয়া হৈছে।
অন্তিম পাঙ্গালৰ বিৰুদ্ধে ভাৰতীয় অলিম্পিক সংস্থাৰ ওচৰত অভিযোগ দাখিল কৰিছিল ফ্ৰান্স কৰ্তৃপক্ষই। পাংগলে তেওঁৰ ভগ্নীক অলিম্পিক ভিলেজত প্ৰৱেশ কৰাবলৈ তেওঁৰ স্বীকৃতি পত্ৰৰ ব্যৱহাৰ কৰাৰ অভিযোগ উত্থাপন হৈছে। বিষয়টোৰ তদন্তৰ অন্তত অন্তিম আৰু তেওঁৰ দলৰ বিৰুদ্ধে কঠোৰ ব্যৱস্থা গ্ৰহণ কৰি বিতাড়িত কৰাৰ সিদ্ধান্ত গ্ৰহণ কৰা হয়।
যোৱা ৭ আগষ্টত অলিম্পিকৰ ১৬ ৰাউণ্ডত তুৰ্কীৰ প্ৰতিদ্বন্দ্বীৰ হাতত পৰাস্ত হোৱাৰ পিছত প্ৰশিক্ষক আৰু স্পৰ্টিং পাৰ্টনাৰক সাক্ষাত কৰিবলৈ গৈছিল অন্তিমে। সেই সময়ত তেওঁ ভগ্নী নিশাক পেৰিছ গেমছ ভিলেজৰ পৰা তেওঁৰ সামগ্ৰীবোৰ আনিবলৈ নিজৰ স্বীকৃতি কাৰ্ড ব্যৱহাৰ কৰিবলৈ কৈছিল।
পেৰিছ গেমছ ভিলেজৰ পৰা অন্তিম পাঙ্গালৰ সামগ্ৰীবোৰ আনিবলৈ যাওঁতেই আৰক্ষীয়ে আটক কৰে অন্তিমৰ ভগ্নী নিছাক। আটকাধীন নিছাক আৰক্ষী থানালৈ লৈ গৈ সোধাপোচা কৰা হয়। ১৯ বৰ্ষীয় যুৱ মল্ল যুঁজাৰু অন্তিম পাঙ্গালকো সোধাপোচা কৰে আৰক্ষীয়ে। ভাৰতীয় অলিম্পিক সন্থাই অন্তিমৰ ভগ্নীক থানাত নাৰাখিবলৈ অনুৰোধ জনায়। ইয়াৰ পিছত হোটেললৈ প্ৰেৰণ কৰা হয় নিছাক।
কেৱল এয়াই নহয়, অন্তিমৰ সহযোগী ষ্টাফ বিকাশ আৰু ভগতক নিচাসক্ত অৱস্থাত কেবৰ চালকক ধন দিবলৈ অস্বীকাৰ কৰাৰ অভিযোগ উঠিছে। চালকে ধন নাপাই অন্তিমৰ সহযোগী ষ্টাফৰ বিৰুদ্ধেও গোচৰ ৰুজু কৰে। ইয়াৰ পিছতেই মল্ল যুঁজাৰুগৰাকীৰ লগতে পৰিয়াল আৰু সহযোগী ষ্টাফক ভাৰতলৈ প্ৰেৰণৰ সিদ্ধান্ত গ্ৰহণ কৰা হয়।
উল্লেখ্য অন্তিম পাঙ্গালৰ বাবে বিনেশ ফোগাটে ৫৩ কিলোগ্ৰাম শাখাৰ পৰিৱৰ্তে ৫০ কিলোগ্ৰাম শাখাত প্ৰতিদ্বন্দ্বিতা কৰিবলৈ বাধ্য হৈছিল। কিয়নো এই ৫৩ কিলোগ্ৰাম শাখাত পূৰ্বেই কোটাৰ জৰিয়তে অলিম্পিকত এণ্ট্ৰী লাভ কৰিছিল অন্তিমে। ইয়াৰ ফলত বিনেশে ৫০ কিলোগ্ৰাম শাখাৰ বাবে নিজৰ ওজন হ্ৰাস কৰিবলৈ চেষ্টা অব্যাহত ৰাখিছিল।
