শ্বেখ হাছিনাৰ পদত্যাগৰ পিছতো বাংলাদেশত অব্যাহত আছে হিন্দুকে ধৰি ধৰ্মীয় সংখ্যালঘু লোকৰ ওপৰত অত্যাচাৰ। উত্তেজিত একাংশ লোকে হিন্দু লোকৰ ঘৰত অগ্নিসংযোগ কৰাৰ লগতে ধৰ্মীয় প্ৰতিষ্ঠানকো আক্ৰমণৰ লক্ষ্য কৰি লৈছে। ইয়াৰ মাজতো বাংলাদেশী হিন্দুৰ সুৰক্ষা নিশ্চিত কৰিবলৈ মোদী চৰকাৰে গ্ৰহণ কৰিছে বৃহৎ পদক্ষেপ।
ভাৰত-বাংলাদেশ সীমান্তৰ শেহতীয়া স্থিতি সন্দৰ্ভত দৃষ্টি ৰাখিবলৈ কেন্দ্ৰীয় চৰকাৰে এখন বিশেষ সমিতি গঠন কৰাৰ সিদ্ধান্ত গ্ৰহণ কৰিছে। এই সন্দৰ্ভত কেন্দ্ৰীয় মন্ত্ৰী অমিত শ্বাহে টুইটযোগে কয় যে, এই সমিতিখনে বাংলাদেশত থকা ভাৰতীয় নাগৰিক, হিন্দুকে ধৰি অন্যান্য ধৰ্মীয় সংখ্যালঘু সমুদায়ৰ সুৰক্ষা সুনিশ্চিত কৰিবলৈ দেশখনৰ বিষয়াসকলৰ সৈতে যোগাযোগ ৰাখিব।
বাংলাদেশৰ ভাৰতীয় আৰু হিন্দু জনগোষ্ঠীৰ স্বাৰ্থ ৰক্ষাৰ বাবে কেন্দ্ৰীয় চৰকাৰে যৎপৰোনাস্তি চেষ্টা কৰিব বুলি স্পষ্ট কৰি দিয়ে গৃহমন্ত্ৰীগৰাকীয়ে। কেন্দ্ৰীয় গৃহমন্ত্ৰীগৰাকীয়ে উল্লেখ কৰা অনুসৰি, এই সমিতিখনক বিশেষভাৱে ভাৰত-বাংলাদেশ সীমান্তৰ নিৰাপত্তা আৰু পৰিস্থিতি নিৰীক্ষণৰ দায়িত্ব দিয়া হৈছে। শেহতীয়াকৈ বাংলাদেশৰ হিংসাত্মক পৰিস্থিতিৰ মাজতে ভাৰতীয় নাগৰিক আৰু সংখ্যালঘু জনগোষ্ঠীৰ সুৰক্ষাৰ বাবে এই পদক্ষেপ গ্ৰহণ কৰিছে ভাৰতৰ চৰকাৰে।
উল্লেখ্য যে যোৱা সোমবাৰে প্ৰধানমন্ত্ৰী শ্বেখ হাছিনাই দেশ এৰি ভাৰতলৈ পলায়ন কৰাৰ পিছতে দেশখনৰ পৰিস্থিতি অধিক ভয়াৱহ হৈ পৰে। একাংশ উত্তেজিত লোকে হিন্দু মন্দিৰ, ঘৰ-দুৱাৰ, ব্যৱসায়িক প্ৰতিষ্ঠান ভাঙি পেলোৱাৰ লগতে আৱামী লীগৰ ২ হিন্দু নেতাক আক্ৰমণ কৰে।
