চকুৰ সমস্যাৰ বাবে উত্তৰ প্ৰদেশৰ বালিয়া জিলাৰ এটা পৰিয়ালে সন্মুখীন হৈছে এক আচৰিত সমস্যাৰ। পৰিয়ালটোৰ চাৰিজন ব্যক্তিয়ে দিনত দেখা নাপায় আৰু দুজনে দেখা নাপায় ৰাতি।
এই পৰিয়ালটোৱে বাস কৰে বালিয়া জিলাৰ হনুমানগঞ্জ ব্লকৰ টাকাৰছন গাঁৱত। পৰিয়ালটোৰ মুৰব্বীজনৰ নাম হৈছে প্ৰবেশ পাছি আৰু পৰিয়ালৰ লোকৰ ভিতৰত সুনীতা আৰু চালেলিয়াই ৰাতি দেখা নাপায়। আনহাতে আৰু চাৰিজন সদস্যই দিনত দেখা নাপায়। তেওঁলোকৰ নাম বৰ্তমানলৈ স্পষ্ট হোৱা নাই।
খবৰ অনুসৰি, এই পৰিয়ালটোৰ ৮গৰাকী সদস্যৰ ভিতৰত ছজন লোকৰেই চকুৰ ৰোগ যাৰ বাবে দেখা নাপায়। কিন্তু তেওঁলোকৰ এই অন্ধতা সাময়িক নহয়, বৰঞ্চ ই কেইঘণ্টামানৰ বাবে থাকে আৰু তাৰ পিছতেই তেওঁলোকৰ চকুৰ দৃষ্টিশক্তি ঘূৰি আহে। উল্লেখ্য যে চাৰিটা শিশুৰ ভিতৰত দুটা শিশুৱে দিনত দেখা নাপায় আৰু দুটাই ৰাতি দেখা নাপায়।
পৰিয়ালটোৱে এই ৰোগৰ চিকিৎসাৰ বাবে বহু চিকিৎসকৰ ওচৰলৈ গৈ চিকিৎসা কৰিছে যদিও এতিয়ালৈকে সুফল পোৱা নাই।
