মহাৰাষ্ট্ৰৰ পুনেত সংঘটিত হৈছে এক চাঞ্চল্যকৰ ঘটনা। ২৯ এপ্ৰিলৰ নিশাৰ ভাগত বন্ধ হৈ থকা পানী পৰিশোধন প্লাণ্টৰ পৰা বিষাক্ত গেছ নিৰ্গত হোৱাৰ ফলত সকলো আতংকিত হৈ পৰে। সমগ্ৰ অঞ্চলটোতেই ক্ষন্তেকতে আতংকই আগুৰি ধৰে আৰু বহু লোক এই ঘটনাৰ ফলত ক্ষতিগ্ৰস্ত হয়।
পুনেৰ কণ্ডৱা অঞ্চলৰ গংগাধাম বসতিস্থলীত বন্ধ হৈ থকা পানী বিশুদ্ধকৰণ প্লাণ্টৰ পৰা ক্ল’ৰিন গেছ নিৰ্গত হোৱাৰ ফলত সংঘটিত হয় এই ঘটনা।২৯ এপ্ৰিলৰ নিশা প্ৰায় ১:০০ বজাত প্লাণ্টটোৰ ভিতৰত থকা ক্ল’ৰিন টেংকৰ পৰা হঠাতে গেছ নিৰ্গত হ’বলৈ ধৰে।
ঘটনাস্থলীত অগ্নিনিৰ্বাপক বাহিনী উপস্থিত হৈ উদ্ধাৰ অভিযান আৰম্ভ কৰে। ক্ষতিগ্ৰস্ত বাসিন্দাসকলক লগে লগে নিৰাপদ স্থানলৈ স্থানান্তৰ কৰা হয়। অৱশ্যে দুজন অগ্নিনিৰ্বাপক বাহিনীৰ লোকো গেছৰ সংস্পৰ্শলৈ আহিছিল। মুঠ ২২ জন স্থানীয় বাসিন্দা আৰু দুজন অগ্নিনিৰ্বাপক বাহিনী বা ২৪ জন লোকক চিকিৎসালয়ত ভৰ্তি হ’বলগীয়া হৈছিল।
আহত আটাইকেইজনকে ছাছুন জেনেৰেল হস্পিতালত ভৰ্তি কৰোৱা হয়। য’ত তেওঁলোক বৰ্তমানেও চিকিৎসাধীন হৈ আছে। বিষয়াসকলৰ মতে, সকলো ৰোগী বৰ্তমান বিপদৰ বাহিৰত আৰু পৰ্যবেক্ষণৰ অধীনত আছে।
এই ঘটনাৰ পিছতে অঞ্চলটো নিৰাপদ কৰি এই গেছ লিক নিয়ন্ত্ৰণ কৰা হয়। কেনেদৰে এনে গাফিলতি সংঘটিত হ’ল সেয়া নিৰ্ণয় কৰিবলৈ প্ৰশাসনে সমগ্ৰ ঘটনাৰ তদন্ত আৰম্ভ কৰিছে। এই ঘটনাই পুনৰবাৰ সুৰক্ষাৰ মানদণ্ডক লৈ গুৰুতৰ প্ৰশ্নৰ উত্থাপন কৰিছে।
