বিগত কিছু দিনৰ পৰা ৰাজস্থানত হৈ থকা ধাৰাসাৰ বৰষুণে ধাৰণ কৰিছে বিধ্বংসী ৰূপ। নেৰানেপেৰা বৰষুণৰ ফলত ভৰতপুৰৰ বায়ানা মহকুমাৰ ফাৰ্চো গাঁৱত সংঘটিত হৈছে এক কৰুণ ঘটনা। অঞ্চলটোৰ এটা পুখুৰীৰ এখন দেৱাল ভাঙি পৰাত পুখুৰীৰ পানীৰ বানে উটুৱাই লৈ যায় আঠটি শিশু।
সেই শিশুসকলৰ ভিতৰত ৭টা শিশুৰ পানীত ডুব যোৱাৰ ফলত মৃত্যু হয়। দুৰ্ঘটনাৰ পিছত সমগ্ৰ অঞ্চলটোত এক অবৰ্ণনীয় পৰিৱেশৰ সৃষ্টি হয়।
জয়পুৰকে ধৰি ৮খন জিলাত মুষলধাৰ বৰষুণৰ বাবে জাৰি কৰা হৈছে হালধীয়া সতৰ্কবাণী। বতৰ বিজ্ঞান বিভাগৰ তথ্য অনুসৰি এইবোৰৰ উপৰি ৰাজ্যৰ ১৪খন জিলাত ধাৰাসাৰ বৰষুণ হোৱাৰ সম্ভাৱনা আছে। আইএমডিৰ পূৰ্বাভাস অনুসৰি কৰৌলী জিলাত পুৱাৰে পৰা বৰষুণ আৰম্ভ হৈছে।
ইফালে দিল্লী-মুম্বাই এক্সপ্ৰেছৱেত আজি পুনৰ এক বৃহৎ পথ দুৰ্ঘটনা সংঘটিত হয়। আজমেৰৰ কিশনগড়ৰ পৰা দিল্লীলৈ যোৱা এখন ব্যক্তিগত বাছ বাগৰি পৰে। বাছখনৰ ষ্টিয়াৰিং বিকল হোৱাৰ বাবেই এই দুৰ্ঘটনা সংঘটিত হোৱা বুলি কোৱা হৈছে।
বাছখনত প্ৰায় ৭০ৰ পৰা ৮০জন যাত্ৰী আছিল। দুৰ্ঘটনাটোত আহত হোৱা ১৪ জন যাত্ৰীক দৌছা জিলা চিকিৎসালয়ত ভৰ্তি কৰোৱা হৈছে। আন একাংশ যাত্ৰীও সামান্য পৰিমানে আঘাতপ্ৰাপ্ত হয়।
কোলৱা থানা এলেকাৰ ১৭৪ নং স্তম্ভৰ সমীপত সংঘটিত হৈছে এই দুৰ্ঘটনা।
