শাক-পাচলী, মাছৰ পিছত এইবাৰ পোহৰলৈ আহিছে গাখীৰৰ নামত বৰবিহ। পুষ্টিকৰ গাখীৰৰ নামত সাধাৰণ লোকসকলক যে বৰবিহ খুৱাই আছে সেই সকলো দৃশ্য বন্দী হৈছে অন কেমেৰাত।
অন কেমেৰাত বন্দী হোৱা দৃশ্যত স্পষ্ট হৈ পৰিছে গাখীৰত কেনেকৈ মিহলোৱা হৈছে নৈৰ দূষিত পানী। এই অস্বাস্থ্যকৰ গাখীৰ সেৱনৰ ফলত আপোনাৰ জীৱনলৈ আহিব পাৰে ভয়ংকৰ বিপদ। এই ঘটনা সংঘটিত হৈছে দক্ষিণ শালমাৰাৰ ফকিৰগঞ্জত।
একাংশ অসাধু ব্যৱসায়ীয়ে নিজৰ মুনাফা লাভৰ বাবে ব্যৱহাৰ কৰিছে নদীৰ পানী। দৈনিক এনেদৰেই অঞ্চলটোৰ হাজাৰ-হাজাৰ ৰাইজে সেৱন কৰি আহিছে এই ভেজাল গাখীৰ।
দক্ষিণ শালমাৰাৰ ফকিৰগঞ্জৰ বৃহত্তৰ অঞ্চলটোৰ চৰঞ্চলৰ একাংশ অসাধু ব্যৱসায়ীৰ বাবে স্বাস্থ্যজনিত সমস্যাত পৰিব পাৰে এই গাখীৰ সেৱন কৰা নগৰ-চহৰৰ জনতা।
এনে এক ভয়ংকৰ ঘটনা পোহৰলৈ অহাৰ পিছত বিভাগীয় কৰ্তৃপক্ষই কেনে পদক্ষেপ গ্ৰহণ কৰিব সেয়া পৰৱৰ্তী সময়তহে লক্ষ্যণীয় হ’ব।
ইনপুট : সহিদুৰ ৰহমান মণ্ডল (হাটশিঙিমাৰী)
