ব্যক্তিগত খণ্ডৰ চাকৰিক কেন্দ্ৰ কৰি ভাৰতৰ বহুলোকে জীৱন নিৰ্বাহ কৰি আছে। ব্যক্তিগত খণ্ডৰ চাকৰি বুলি কলেই কৰ্মচাৰীৰ ভয়-শংকা বৃদ্ধি পায়। কিয়নো কোন মুহূৰ্তত চাটাই হ’ব লগা হয় বা কোন মুহূৰ্ততে বিপদ আহিব পাৰে তাৰ কোনো নিশ্চয়তা নাই।
শেহতীয়াকৈ তেনেকুৱা এক অনুভৱ হৈছিল এটা কোম্পানীৰ কৰ্মচাৰীৰ মাজত। কিয়নো স্বত্বাধিকাৰীয়ে কোম্পানীটো বিক্ৰী কৰিব ওলাইছিল। সেই মুহূৰ্ততে কোম্পানীটোৰ কৰ্মচাৰীসকলৰ মাজত চিন্তা বৃদ্ধি পাইছিল। নতুন মালিকে কেনেকুৱা ধৰণৰ নিয়ম বনাই বা কৰ্মচাৰীসকলৰ চাটাই কৰিব নেকি এনেকুৱা হাজাৰটা প্ৰশ্ন মনলৈ আহিছিল সকলোৰে মনত।
অৱশ্যে, কৰ্মচাৰীসকলে ভবাই নাছিল স্বত্বাধিকাৰীয়ে বিক্ৰী কৰিব ওলোৱা কোম্পানীটোয়ে তেওঁলোকৰ জীৱনলৈ আৰ্শীবাদ হৈ আহিব।
শেহতীয়াকৈ ক্লাউড-চিকিউৰিটি কোম্পানী জেস্কেলাৰৰ মুখ্য কাৰ্যবাহী বিষয়া জয় চৌধুৰীয়ে বিক্ৰী কৰা কোম্পানীৰ বাবে লাভৱান হৈছিল কৰ্মচাৰীসকল। যেতিয়া তেওঁ ষ্টাৰ্টআপ বিক্ৰী কৰিছিল তেতিয়া ৭০ জন কৰ্মচাৰী কোটিপতি হৈ পৰিছিল।
উল্লেখ্য যে, ৯০ ৰ দশকত ৬৫ বছৰীয়া জয় চৌধুৰীয়ে চিকিউৰিটি নামৰ এটা কোম্পানী আৰম্ভ কৰিছিল। জয় চৌধুৰীয়ে চিএনবিচিক কৈছিল যে, কোম্পানীৰ বিনিয়োগকাৰীসকলে তেওঁক তেওঁৰ কোম্পানীৰ ভিতৰত কৰ্মচাৰীসকলক ইকুইটি (শ্বেয়াৰ) দিয়াৰ অনুমতি দিছিল। ইয়াৰ বাবে তেওঁ তেওঁৰ বহুতো কৰ্মচাৰীক ইকুইটি দিছিল।
যেতিয়া তেওঁ ১৯৯৮ চনত তেওঁৰ কোম্পানী ভেৰিচাইনক বিক্ৰী কৰিছিল কেৱল জয় চৌধুৰীয়েই নহয় তেওঁৰ কৰ্মচাৰীসকলৰ বিত্তীয় লাভালাভ হৈছিল। কোম্পানী বিক্ৰী কৰাৰ বাবে প্ৰায় ৭০ জন কৰ্মচাৰী কোটিপতি হৈছিল।
উল্লেখ্য যে, জয় চৌধুৰীৰ জন্ম ১৯৫৯ চনত হিমাচল প্ৰদেশৰ উনাৰ পানোহ গাঁৱত হৈছিল। তেখেতৰ পিতৃ এজন কৃষক আছিল। জয় চৌধুৰীৰ সম্পূৰ্ণ নাম জগতাৰ সিং চৌধুৰী। জগতাৰে বিদ্যালয়লৈ যাবলৈ প্ৰতিদিনে ৮ কিলোমিটাৰ খোজ কাঢ়িছিল। তেওঁ বিএইচইউৰ পৰা স্নাতক ডিগ্ৰী লাভ কৰে আৰু তাৰ পিছত ১৯৮২ চনত আমেৰিকা যুক্তৰাষ্ট্ৰৰ ছিনচিনাটি বিশ্ববিদ্যালয়ৰ পৰা এমবিএ ডিগ্ৰী লাভ কৰে।
