হিমাচলৰ মাণ্ডীৰ সাংসদ তথা অভিনেত্ৰী কংগনা ৰনৌত পুনৰ এবাৰ বাতৰিৰ শিৰোণামলৈ আহিছে। নিজ মন্তব্যৰ বাবে চৰ্চাত থকা কংগনাই এইবাৰ কৃষকৰ স্বাৰ্থত এই তিনিখন কৃষি আইন পুনৰ কাৰ্যকৰী কৰাৰ দাবী জনাইছে।
এই আইনসমূহ পুনৰ কাৰ্যকৰী কৰাৰ বাবে কৃষকসকলে নিজেই চৰকাৰৰ ওচৰত দাবী উত্থাপন কৰিব লাগে বুলিও তেওঁ কয়। কংগনাৰ এই বক্তব্যত কংগ্ৰেছে প্ৰত্যুত্তৰ দি কয় যে কংগ্ৰেছে কেতিয়াও এনেকুৱা হ’বলৈ নিদিয়ে।
আচলতে কংগনাই নিজৰ সমষ্টিত উপস্থিত হৈ তেওঁ দলীয় কর্মীসকলৰ সৈতে বৈঠকত মিলিত হৈ বিজেপিৰ সদস্যপদ প্রচাৰত অংশগ্রহণ কৰে৷ ইয়াৰ পিছত সংবাদ মাধ্যমৰ সৈতে কথা পাতি কংগনাই কয় যে কৃষকৰ কল্যাণমূলক লোকচানৰ ক্ষতিপূৰণ দিব লাগে। ইয়াৰ বাবে কৃষকসকলেও মাত মাতিব লাগে। কাৰণ তেওঁলোক দেশৰ খাদ্য যোগানকাৰী আৰু তেওঁলোকে নিজৰ মতামত প্ৰকাশ কৰিবলৈ আগবাঢ়ি অহা উচিত।
তিনিওখন কৃষি আইন পুনৰ কাৰ্যকৰী কৰাৰ দাবীত তেওঁ কয়, ‘যি তিনিখন কৃষি আইন প্ৰত্যাহাৰ কৰা হৈছিল, মই ভাবো সেই আটাই কেইখন পুনৰ কাৰ্যকৰী কৰা উচিত। হয়তো মোৰ বক্তব্যই বিতৰ্কৰ সৃষ্টি কৰিব। কিন্তু কৃষকৰ বাবে এই তিনিখন উপকাৰী আইন পুনৰ কাৰ্যকৰী হ’ব লাগে। কৃষকসকলেই দেশৰ শক্তিৰ মূল স্তম্ভ। হাতযোৰ কৰি মই অনুৰোধ জনাইছো যে, তেওঁলোকে নিজেই আবেদন কৰিব লাগে আৰু সকলো কৃষকৰ স্বাৰ্থৰ কথা মনত ৰাখি এই আইন তিনিখন পুনৰ কাৰ্যকৰী কৰিবলৈ অনুৰোধ কৰিব লাগে।‘
ইফালে কংগ্ৰেছে নিজৰ অফিচিয়েল এক্স হেণ্ডেলৰ জৰিয়তে কংগনাই মন্তব্য কৰা ভিডিঅ’ শ্বেয়াৰ কৰি কয়, ‘কৃষকৰ ওপৰত জাঁপি দিয়া ক’লা আইন তিনিখন পুনৰ কাৰ্যকৰী কৰিব লাগে। বিজেপিৰ সাংসদ কংগনাই এই কথা কৈছে। দেশৰ ৭৫০ গৰাকী কৃষক শ্বহীদ হোৱাৰ পিছত মোদী চৰকাৰ সাৰ পাইছিল আৰু তাৰ পিছত এই তিনিখন ক’লা আইন প্ৰত্যাহাৰ কৰিছিল। এতিয়া বিজেপি সাংসদে পুনৰ এই তিনিখন আইন কাৰ্যকৰী কৰাৰ পৰিকল্পনা কৰিছে। কংগ্ৰেছ কৃষকৰ লগত আছে। নৰেন্দ্ৰ মোদীৰ লগতে তেওঁলোকৰ সাংসদসকলে যিমানেই চেষ্টা নকৰক কিয়, এই ক’লা আইন তিনিখন কেতিয়াও আৰু কাৰ্যকৰী নহয়’।
