জীৱিত পুত্ৰিকা ব্ৰত, যাক জিতিয়া ব্ৰত বুলিও জনা যায়, হৈছে এক পৱিত্ৰ উৎসৱ, য’ত মাতৃসকলে নিজৰ শিশুৰ দীৰ্ঘ-আয়ুস, সুখ-সমৃদ্ধি আৰু স্বাস্থ্যৰ বাবে পালন কৰে।
এই উৎসৱ বিশেষকৈ বিহাৰ, উত্তৰ প্ৰদেশ, ঝাৰখণ্ড আৰু নেপালৰ কিছু অংশত উদযাপন কৰা হয়। এই দিনটোত, মহিলাসকলে পানী অবিহনে উপবাস পালন কৰে আৰু তেওঁলোকৰ পুত্ৰ আৰু কন্যাৰ দীৰ্ঘজীৱন আৰু কল্যাণৰ বাবে প্ৰাৰ্থনা কৰে।
হিন্দু বৰ্ষপঞ্জী অনুসৰি, আহিন মাহৰ কৃষ্ণ পক্ষৰ অষ্টমী তিথিত হয়। এই বৰ্ষৰ জীৱিত পুত্ৰিকা ব্ৰত ২৫ ছেপ্তেম্বৰ অৰ্থাৎ বুধবাৰে অনুষ্টিত হয়।
বৃহস্পতিবাৰে ৰাজ্য চৰকাৰে জাৰি কৰা এক বিবৃতিত কোৱা হৈছে যে, ‘জীৱিত পুত্ৰিকা’ উৎসৱৰ তিনিদিনীয়া উদযাপনৰ সময়ত বিহাৰৰ নদী আৰু পুখুৰীত পৱিত্ৰ স্নান কৰোঁতে ৩৭ টা শিশুসহ প্ৰায় ৪৬ জন লোক পানীত ডুব যায়।
মৃত ৪৬ জনৰ ভিতৰত ৪গৰাকী মহিলা আছিল।
পূৰ্বতে ২০২৩ চনত, ৰাজ্যখনত ‘জীৱিত পুত্ৰিকা’ উৎসৱ উদযাপনৰ সময়ত মুঠ ২২ গৰাকী লোকৰ মৃত্যু হৈছিল। তিনিদিনীয়া এই উৎসৱটো ‘নাহাই খাই’ৰ সৈতে আৰম্ভ হয় আৰু ভক্তসকলে অনুষ্ঠানটোত নদী আৰু পুখুৰীত পৱিত্ৰ পানীত স্নান কৰে।
বৃহস্পতিবাৰে বিহাৰ চৰকাৰে জাৰি কৰা এক বিবৃতিত কোৱা হৈছে যে, ‘জিতিয়া’ বা ‘জীৱিতপুত্ৰিকা’ উৎসৱৰ সময়ত ৰাজ্যজুৰি নদী আৰু পুখুৰীত পৱিত্ৰ ডুব দিয়াৰ সময়ত ৪৩ গৰাকী লোকৰ মৃত্যু হৈছে আৰু আন তিনিজন সন্ধানহীন হৈ আছে।
বুধবাৰে পালন কৰা উৎসৱৰ সময়ত ৰাজ্যখনৰ ১৫ খন জিলাৰ পৰা মৃত্যুৰ খবৰ পোৱা গৈছে। বৰ্তমানলৈকে মুঠ ৪৩ টা মৃতদেহ উদ্ধাৰ কৰা হৈছে। পৰৱৰ্তী অনুসন্ধান অভিযান অব্যাহত আছে বুলি বিহাৰৰ দুৰ্যোগ ব্যৱস্থাপনা বিভাগে জানিবলৈ দিয়ে।
ডুব যোৱাৰ এই ঘটনা পূৱ চম্পাৰণ, পশ্চিম চম্পাৰণ, ঔৰঙ্গাবাদ, নালন্দা, কাইমুৰ, বাক্সাৰ, চিৱান, ৰোহতাছ, চাৰণ, পাটনা, বৈশালী, মুজাফৰপুৰ, সমস্তিপুৰ, গোপালগঞ্জ আৰু আৰৱাল জিলাত সংঘটিত হৈছে।
বিহাৰৰ মুখ্যমন্ত্ৰী নীতিশ কুমাৰে এই ঘটনাটোত শোক প্ৰকাশ কৰে আৰু মৃতকৰ নিকটাত্মীয়ৰ বাবে ৪ লাখ টকাৰ অনুদান ঘোষণা কৰে।
