অৱশেষত বৰ্ণিল টেনিছ কেৰিয়াৰৰ অন্ত পেলোৱাৰ সিদ্ধান্ত ল’লে তাৰকা টেনিছ খেলুৱৈ ৰাফেল নাডালে। এই প্ৰবীণ খেলুৱৈগৰাকীয়ে বৃহস্পতিবাৰে ইনষ্টাগ্ৰামত এটা ভিডিঅ’ শ্বেয়াৰ কৰি অনুৰাগীৰ সৈতে এই তথ্য শ্বেয়াৰ কৰিছে।
ভিডিঅ’টোত ৰাফেল নাডালে কয় যে তেওঁ বহু ভাবি চিন্তি এই সিদ্ধান্ত লৈছে। তেওঁৰ কেৰিয়াৰৰ শেষৰখন মেচ হ’ব ডেভিছ কাপৰ ফাইনেল। এই একেখন প্ৰতিযোগিতাৰ পৰাই আৰম্ভ হৈছিল তেওঁৰ কেৰিয়াৰ।
২০০৪ চনত কেৰিয়াৰ আৰম্ভ কৰা নাডালে তেওঁৰ কেৰিয়াৰত সহায় কৰা সকলো লোককে ধন্যবাদ জ্ঞাপন কৰে। লগতে তেওঁৰ কেৰিয়াৰৰ বহুখিনি সময় কটোৱা প্ৰতিদ্বন্দ্বীসকলকো ধন্যবাদ জনায়। নাডালে ৰ’জাৰ ফেডাৰাৰ আৰু ন’ভাক জ’কভিচৰ সৈতে কটোৱা মুহূৰ্তৰ ভিডিঅ’ শ্বেয়াৰ কৰে।
মাতৃক ধন্যবাদ জনাই নাডালে কয় যে মাতৃৰ ত্যাগৰ বাবেই তেওঁ আজি এই স্থানত উপনীত হ’বলৈ সক্ষম হৈছে। লগতে ১৯ বছৰ ধৰি তেওঁৰ লগত থকা পত্নী মেৰীকো ধন্যবাদ জ্ঞাপন কৰে।
উল্লেখ্য যে, ৰাফেল নাডালে নিজৰ কেৰিয়াৰত ২২ টা গ্ৰেণ্ড শ্লেম জয় কৰিবলৈ সক্ষম হৈছে। ইয়াৰ ভিতৰত আছে ১২টা ফ্ৰেন্স অ’পেন, দুটা অষ্ট্ৰেলিয়ান অ’পেন, দুটা উইম্বলডন আৰু ৪টা ইউ এছ অ’পেন খিতাপ। ইয়াৰ উপৰি তেওঁ অলিম্পিকত দুবাৰকৈ স্বৰ্ণ পদক লাভ কৰিছে। ২০০৮ চনত বেইজিং অলিম্পিকত একক শাখাত সোণৰ পদক লাভ কৰাৰ লগতে ২০১৬ চনত ৰিঅ’ অলিম্পিকত ডাবলছত সোণৰ পদক লাভ কৰে।
কেৱল এয়াই নহয় ২০০৪, ২০০৯, ২০১১ আৰু ২০১৯ চনত ডেভিছ কাপ জয় কৰা স্পেনিছ দলৰ অংশও আছিল নাডাল।
