ইটালীৰ অপুলিয়াত চলি থকা G-7 সন্মিলনত ভাগ ল’লে প্ৰধানমন্ত্ৰী নৰেন্দ্ৰ মোদীয়ে। আমেৰিকা, বৃটেইন, ফ্ৰান্সকে ধৰি বহুকেইখন ৰাষ্ট্ৰৰ ৰাষ্ট্ৰপ্ৰধানৰ সৈতে গুৰুত্বপূৰ্ণ বিষয়ত আলোচনা চলিল প্ৰধানমন্ত্ৰী মোদীৰ।
আমেৰিকাৰ ৰাষ্ট্ৰপতি জ’ বাইডেন সাক্ষাত সন্দৰ্ভত ছ’চিয়েল মিডিয়াত উল্লেখ কৰিলে মোদীয়ে। জ’ বাইডেনক সাক্ষাত কৰাটো সদায়ে সুখৰ বিষয় বুলি ছ’চিয়েল মিডিয়াত উল্লেখ কৰে প্ৰধানমন্ত্ৰী মোদীয়ে। পূৰ্বৰ দৰেই ভাৰত আৰু আমেৰিকাই বিশ্বৰ উন্নতিৰ বাবে আৰু অধিক কাম কৰিব বুলি সংকল্পবদ্ধ হয়।
ফ্ৰান্সৰ ৰাষ্ট্ৰপতি ইমানুৱেল মেক্ৰ’, বৃটেইনৰ প্ৰধানমন্ত্ৰী ঋষি সুনক, ইউক্ৰেইনৰ ৰাষ্ট্ৰপতি ব্লাডিমিৰ জেলেনেস্কি, জাপানৰ প্ৰধানমন্ত্ৰী ফুমিঅ’ কিছিদা, কানাডাৰ প্ৰধানমন্ত্ৰী জাষ্টিন ট্ৰুডৰ সৈতে বাৰ্তালাপ কৰে মোদীয়ে।
ইয়াৰ লগতে পোপ ফ্ৰান্সিককো সাক্ষাত কৰি পোপগৰাকীৰ খবৰ লয় মোদীয়ে। সাতখন দেশৰ G7 সন্মিলন সম্বোধন কৰা প্ৰথমগৰাকী পোপ হৈ পৰে পোপ ফ্ৰান্সিস। AIৰ ভাল সম্ভাৱনাৰ লগতে AIৰ পৰা হ’ব পৰা বিপদ সম্পৰ্কে সৰৱ আলোচনা কৰে পোপ ফ্ৰান্সিসে।
প্ৰধানমন্ত্ৰী মোদীয়ে ইমানুৱেল মেক্ৰ’ৰ সৈতে দ্বিপক্ষীয় বৈঠকত অংশ লয়। এই বৈঠকত পৰমাণু, প্ৰতিৰক্ষা, মহাকাশীয় শিক্ষণ, জলবায়ু, AI সন্দৰ্ভত বহু গুৰত্বপূৰ্ণ আৰু দীঘলীয়া আলোচনা চলে।
আনহাতে বৃটেইনৰ প্ৰধামন্ত্ৰীৰ সৈতে বৃটেইন আৰু ভাৰতৰ মাজত বাণিজ্যিক দিশ সন্দৰ্ভত আলোচনা কৰে। ভাৰত আৰু বৃটেইনৰ মাজত আৰ্থিক সহযোগিতাৰ আলোচনাৰ লগতে শিক্ষা আৰু বাণিজ্যৰ ক্ষেত্ৰতো আলোচনা চলে।
প্ৰধানমন্ত্ৰী মোদীৰ এই G7 সন্মিলনত অংশ লোৱা দিশটোৱে ভাৰতৰ উন্নতিৰ ক্ষেত্ৰত আন এক আশাৰ কিৰণ দেখা গৈছে। ৰাষ্ট্ৰসমূহৰ সৈতে হোৱা আলোচনাৰ বাবে এটা ভাল দিশলৈ ভাৰত আগবাঢ়ি যাব বুলি বুদ্ধিজীৱীৰ লগতে গৱেষকসকলে মত প্ৰকাশ কৰিছে।
