বাংগালুৰুত আলহী দল নিউজিলেণ্ডে ভাৰতীয় দলক ৮ উইকেটত পৰাস্ত কৰি তিনিখন মেচৰ টেষ্ট শৃংখলাত ১-০ ৰ অগ্ৰগতি লাভ কৰে। চিন্নাস্বামী ষ্টেডিয়ামত অনুষ্ঠিত মেচখনত ভাৰতে নিউজিলেণ্ড দলক বান্ধি দিছিল মাত্ৰ ১০৭ ৰানৰ লক্ষ্য।
নিউজিলেণ্ড দলে দুটা উইকেট হেৰুৱাইয়ে এই সহজ লক্ষ্যত উপনীত হয়। নিউজিলেণ্ড দলৰ প্ৰথম ইনিংছত ৰাচিন ৰবীন্দ্ৰই ১৩৪ ৰানৰ এক সুন্দৰ শতকীয় ইনিংছ খেলিছিল।
উল্লেখ্য যে, প্ৰথম ইনিংছত বেটিং বিপৰ্যয়ৰ বাবেই মেচখনত পৰাজয়বৰণ কৰিবলগীয়া হয় ভাৰত। প্ৰথম ইনিংছত ভাৰতে সংগ্ৰহ কৰিছিল মাত্ৰ ৪৬ ৰান। ইয়াৰ প্ৰত্যুত্তৰত নিউজিলেণ্ড দলে ৪০২ ৰান সংগ্ৰহ কৰি ৩৫৬ ৰানৰ বৃহত অগ্ৰগতি লাভ কৰে।
অৱশ্যে দ্বিতীয় ইনিংছত ছৰফৰাজ খানৰ ১৫০, ঋষভ পণ্টৰ ৯৯ আৰু বিৰাট কোহলীৰ ৭০ ৰানৰ ইনিংছৰ সহায়ত মেচখনত কিছু পৰিমাণে প্ৰত্যাৱৰ্তন কৰিবলৈ সক্ষম হয় ভাৰত। মেচখনৰ চতুৰ্থ দিনাৰ চাহ বিৰতিৰ সময়লৈকে ভাৰতে চাৰিটা উইকেটৰ বিনিময়ত ৪০৮ ৰান কৰি শক্তিশালী স্থিতিত উপনীত হৈছিল যদিও কে এল ৰাহুল, ৰবীন্দ্ৰ জাদেজা আৰু অশ্বিনৰ বেটিং বিফলতাৰ বাবে ৪৬২ ৰানতে দ্বিতীয় ইনিংছ সামৰে আৰু নিউজিলেণ্ড দলে লাভ কৰে মাত্ৰ ১০৭ ৰানৰ লক্ষ্য।
এইদৰে দুটা উইকেট হেৰুৱাই নিউজিলেণ্ড দলে মেচখন জয়ী হৈ এক বিশেষ কৃতিত্বও অৰ্জন কৰে। টম লাথাম নেতৃত্বাধীন নিউজিলেণ্ড দলে ৩৬ বছৰৰ পিছত ভাৰতৰ বিৰুদ্ধে ভাৰতৰ ভূমিত টেষ্ট মেচ জয়ী হোৱাৰ কৃতিত্ব গঢ়ে।
নিউজিলেণ্ড দলে অন্তিমবাৰৰ বাবে ১৯৮৮ চনত ভাৰতৰ ভূমিক টেষ্ট মেচত জয়ী হৈছিল।
