বৰ্ধিত প্ৰদূষণৰ সৈতে মোকাবিলা কৰিবলৈ ভাৰতৰ বহু ৰাজ্যই গ্ৰহণ কৰিছে কঠোৰ পদক্ষেপ। পৰিৱেশৰ প্ৰতি লক্ষ্য ৰাখি পোহৰৰ উৎসৱ দীপাৱলীৰ বাবে দিল্লী, পঞ্জাব, তামিলনাডুৰ দৰে ৰাজ্যই ফটকা ব্যৱহাৰৰ ক্ষেত্ৰত কঠোৰ নিয়ম আৰোপ কৰিছে।
এই মহোৎসৱৰ সময়ত বায়ুৰ গুণাগুণৰ অৱনতি ৰোধৰ লক্ষ্যৰে কেইবাখনো ৰাজ্যই কঠোৰ নিয়ম প্ৰস্তুত কৰিছে। পৰিৱেশ আৰু স্বাস্থ্যৰ কথা মনত ৰাখি ফটকা নিষিদ্ধ কৰাৰ সিদ্ধান্ত লোৱা সেই ৭খন ৰাজ্যৰ বিষয়ে জানো আহক।
প্ৰতি শীতকালতে দিল্লীত বায়ুৰ গুণাগুণৰ গুৰুতৰ সমস্যাই দেখা দিয়ে। এই সমস্যাৰ সৈতে মোকাবিলা কৰিবলৈ “দিল্লী প্ৰদূষণ নিয়ন্ত্ৰণ সমিতি” (ডিপিচিচি)-এ ২০২৫ চনৰ ১ জানুৱাৰীলৈকে সকলো ধৰণৰ ফটকা প্ৰস্তুত, সংৰক্ষণ, বিক্ৰী আৰু ব্যৱহাৰৰ ওপৰত সম্পূৰ্ণ নিষেধাজ্ঞা আৰোপ কৰিছে। ইয়াৰ ভিতৰত অনলাইন বিক্ৰীও অন্তৰ্ভুক্ত। দীপাৱলী, বৰদিন আৰু নৱবৰ্ষৰ দিনটোত মাত্ৰ কেইঘণ্টামানৰ বাবেহে কেৱল ‘সেউজীয়া ফটকা’হে জ্বলাবলৈ দিয়া হয়।
প্ৰদূষণৰ হাৰ হ্ৰাস কৰিবলৈ বিহাৰতো ফটকা ফুটুওৱাত নিষেধাজ্ঞা আৰোপ কৰিছে। ৰাজ্যখনৰ প্ৰধান চহৰ পাটনা, গয়া, মুজফ্ফৰপুৰ আৰু হাজীপুৰত সকলো ধৰণৰ ফটকা সম্পূৰ্ণ নিষিদ্ধ কৰা হৈছে।
ইফালে মহাৰাষ্ট্ৰত কেৱল সেউজীয়া ফটকাৰহে অনুমতি দিয়া হৈছে। এই ফটকা সাধাৰণ ফটকাৰ তুলনাত প্ৰায় ৩০% কম প্ৰদূষণ হয়। ইয়াৰ উপৰি মুম্বাই আৰক্ষীয়ে ২৩ অক্টোবৰৰ পৰা ২৪ নৱেম্বৰলৈ আকাশ বন্তি বিক্ৰী আৰু ব্যৱহাৰত নিষেধাজ্ঞা আৰোপ কৰিছে।
ইফালে কৰ্ণাটকৰ ৰাজ্য চৰকাৰে ৰাইজক কেৱল সেউজীয়া ফটকা ব্যৱহাৰ কৰিবলৈ আহ্বান জনাইছে। ৰাজ্যখনৰ পৰিৱেশ মন্ত্ৰীয়ে দীপাৱলীত ফটকা ফুটুওৱাৰ সময় নিশা ৮ৰ পৰা ১০ বজালৈ সীমিত কৰাৰ পৰামৰ্শ প্ৰদান কৰিছে যদিও চৰকাৰীভাৱে কোনো নিষেধাজ্ঞা দিয়া হোৱা নাই।
উচ্চতম ন্যায়ালয় আৰু এন জি টিৰ নিৰ্দেশ অনুসৰি পঞ্জাৱত ফটকা ব্যৱহাৰ দীপাৱলী, গুৰুপুৰ্ব, বৰদিন আৰু নৱবৰ্ষৰ পূৰ্বে নিশা ৮ৰ পৰা ১০ বজালৈ সীমাবদ্ধ কৰি ৰখা হৈছে। ইয়াত কেৱল সেউজীয়া ফটকাহে জ্বলাবলৈ দিয়া হৈছে।
কেৰালাত দীপাৱলীত ফটকা জ্বলোৱাৰ সময় নিশা ৮ বজাৰ পৰা ১০ বজালৈ নিৰ্ধাৰণ কৰা হৈছে। ইয়াৰ উপৰি বৰদিন আৰু নৱবৰ্ষৰ দিনা ফটকা জ্বলোৱাৰ সময় নিশা ১১:৫৫ বজাৰ পৰা নিশা ১২:৩০ বজালৈ নিৰ্ধাৰণ কৰিছে। ইয়াত কেৱল সেউজীয়া ফটকা বিক্ৰীৰহে অনুমতি প্ৰদান কৰা হৈছে।
তামিলনাডু চৰকাৰে দীপাৱলীত ফটকা ফুটোৱাৰ সময় পুৱা ৬ৰ পৰা ৭ বজালৈ আৰু সন্ধিয়া ৭ৰ পৰা ৮ বজালৈ সীমাবদ্ধ কৰি ৰাখিছে।
আনহাতে পশ্চিমবংগতো ফটকা জ্বলোৱাত নিষেধাজ্ঞা আৰোপ কৰা হৈছে। মুখ্যমন্ত্ৰী মমতা বেনাৰ্জীৰ নেতৃত্বাধীন ৰাজ্য চৰকাৰে এন জি টিৰ নীতি-নিৰ্দেশনা মানি দেৱালীত কেৱল প্ৰমাণিত সেউজীয়া ফটকাহে জ্বলোৱাৰ অনুমতি প্ৰদান কৰিছে। কলকাতাত দেৱালীৰ দিনা নিশা ৮ৰ পৰা ১০ বজালৈহে ফটকা জ্বলাব পাৰে।
উল্লেখ্য যে, বায়ুৰ গুণাগুণৰ অধিক অৱনতি ৰোধৰ প্ৰচেষ্টা তথা প্ৰদূষণ ৰোধ কৰাৰ বাবে এইধৰণৰ কঠোৰ নীতি-নিৰ্দেশনা জাৰি কৰিছে।
