ভাৰত আৰু নিউজিলেণ্ডৰ শৃংখলাৰ অন্তিমখন খেল মুম্বাইৰ ৱাংখেড়ে ষ্টেডিয়ামত অনুষ্ঠিত হৈ আছে। টছত জয়ী হৈ বেটিং কৰাৰ সিদ্ধান্ত গ্ৰহণ কৰা নিউজিলেণ্ডৰ দলটোৱে প্ৰথম দিনাই ২৩৫ ৰান সংগ্ৰহ কৰি প্ৰথম ইনিংছ সামৰে।
নিউজিলেণ্ডক সীমিত স্ক’ৰতে অলআউট কৰাৰ আঁৰত আছিল ৰবীন্দ্ৰ জাদেজা। দুৰ্দান্ত প্ৰদৰ্শনেৰে জাদেজাই ঈশান্ত শৰ্মা আৰু জাহিৰ খানৰ অভিলেখ ভংগ কৰি বিশেষ ক্লাবত যোগদান কৰিছে।
এই ইনিংছৰ প্ৰথম ১১ অভাৰত জাদেজাই সফলতা লাভ কৰা নাছিল যদিও ১২ নং অভাৰত এই তাৰকাগৰাকীয়ে ধাৰাবাহিকভাৱে দুজন বেটছমেনক পেভিলিয়নৰ পথ দেখুৱাইছিল। সঠিক লাইন-লেংথত বলিং কৰি ২২ অভাৰত ৬৫ ৰান খৰছ কৰি ৫ উইকেট দখল কৰে। টেষ্ট ক্ৰিকেটত জাদেজাৰ এয়া ১৪ সংখ্যক ৫ উইকেট দখল।
ইফালে নিজৰ তৃতীয়টো উইকেট দখল কৰি জাদেজাই ভাৰতৰ হৈ সৰ্বাধিক টেষ্ট উইকেট দখল কৰাৰ ক্ষেত্ৰত ঈশান্ত শৰ্মা আৰু জাহিৰ খানৰ অভিলেখ ভংগ কৰে। ঈশান্ত শৰ্মা আৰু জাহিৰ খান দুয়োজনে টেষ্টত ৩১১টা উইকেট দখল কৰিছিল। জাদেজাৰ নামত এতিয়া ৩১৪টা টেষ্ট উইকেট আছে।
ইয়াৰ উপৰি জাদেজাই ভাৰতৰ হৈ সৰ্বাধিক টেষ্ট উইকেট দখল কৰা পঞ্চমজন বলাৰ হিচাপেও পৰিগণিত হৈছে।
ভাৰতৰ হৈ সৰ্বাধিক টেষ্ট উইকেট দখল কৰা শীৰ্ষ ৫ বলাৰ
অনিল কুম্বলে – ৬১৯
ৰবিচন্দ্ৰন অশ্বিন – ৫৩৩
কপিল দেৱ – ৪৩৪
হৰভজন সিং – ৪১৭
ৰবীন্দ্ৰ জাদেজা – ৩১৪
আনহাতে ৩০০০ ৰান আৰু ৩০০ উইকেটৰ পৰিসংখ্যা অৰ্জন কৰা তৃতীয়জন ভাৰতীয় খেলুৱৈ হিচাপেও পৰিগণিত হয় জাদেজা। ইয়াৰ পূৰ্বে এই কৃতিত্ব অৰ্জন কৰিছিল কপিল দেৱ আৰু ৰবিচন্দ্ৰন অশ্বিনে। ইংলেণ্ডৰ ইয়ান বোথামৰ পিছত এই কৃতিত্ব অৰ্জন কৰা দ্বিতীয় দ্ৰুততম খেলুৱৈ জাদেজা।
