অহা বছৰ অৰ্থাৎ ২০২৫ চনৰ জানুৱাৰী মাহত অনুষ্ঠিত হ’ব মহা কুম্ভ মেলা। এই মহাকুম্ভ মেলা ১৩ জানুৱাৰীৰ পৰা ২৬ ফেব্ৰুৱাৰীলৈ চলিব।
প্ৰয়াগৰাজ, হৰিদ্বাৰ, উজ্জয়িন, আৰু নাচিককে ধৰি চাৰিটা স্থানত প্ৰতি ১২ বছৰৰ মূৰে মূৰে কুম্ভ মেলাৰ আয়োজন কৰা হয়। এইবাৰ উত্তৰ প্ৰদেশৰ প্ৰয়াগৰাজত মহাকুম্ভৰ আয়োজন কৰা হ’ব। এই মেলা কেৱল ধৰ্মীয় অনুষ্ঠান নহয়, সাংস্কৃতিক আৰু সামাজিক উৎসৱো।এইবাৰ সংগমস্থলীত ৪০ কোটিৰো অধিক লোক সমবেত হ’ব।
এইবাৰ যদি আপুনি কুম্ভ স্নান কৰাৰ পৰিকল্পনা কৰিছে, তেন্তে ইয়াৰ বাবে আগতীয়াকৈ কিছু বিশেষ প্ৰস্তুতি কৰিব লাগিব।
ৰেলৰ টিকট বুকিং-
কুম্ভমেলালৈ যোৱাৰ আগতে আটাইতকৈ গুৰুত্বপূৰ্ণ কথাটো হ’ল- আগতীয়াকৈ ট্ৰেইনৰ টিকট বুকিং কৰা। শেহতীয়াকৈ ৰেলৱেৰ টিকট বুকিঙৰ নিয়ম সলনি কৰিছে, য’ত প্ৰায় দুমাহ আগতেই টিকট বুকিং কৰিব পৰা যাব। দেশৰ লগতে বিশ্বৰ বিভিন্ন প্ৰান্তৰ পৰা মানুহ কুম্ভলৈ আহে, গতিকে যিকোনো ধৰণৰ অসুবিধাৰ পৰা হাত সাৰিবলৈ আগতীয়াকৈ ভ্ৰমণৰ টিকট বুকিং কৰা উচিত।
গৰম কাপোৰ আৰু নথি-পত্ৰ-
বিশেষকৈ শীতকালত মহা কুম্ভ মেলা অনুষ্ঠিত হয়। সেয়েহে গৰম কাপোৰ, ছাতি আৰু আৰামদায়ক জোতাৰ প্ৰয়োজন হ’ব। নিজৰ সুৰক্ষাৰ বাবে পৰিচয় পত্ৰ, টিকট আৰু নগদ ধনৰ দৰে গুৰুত্বপূৰ্ণ নথি-পত্ৰ ৰখা উচিত।
ঔষধ আৰু খাদ্য সামগ্ৰী-
লঘু খাদ্য সামগ্ৰীও লগত ৰখা উচিত। ইয়াৰ লগতে সৰু বেগত পানী, ঔষধ আৰু প্ৰাথমিক চিকিৎসাৰ সামগ্ৰী ৰখাটোও বুদ্ধিমানৰ কাম হ’ব। যিকোনো জৰুৰী চিকিৎসা পৰিস্থিতিৰ সৈতে মোকাবিলা কৰিবলৈ এই সকলোবোৰ কথা প্ৰয়োজনীয়।
বাসস্থানৰ বুকিং-
ইয়াৰ লগতে মহা কুম্ভলৈ যোৱাৰ আগতে নিজৰ থকাৰ বাবে লজ বা শোৱা কোঠা আগতীয়াকৈ বুকিং কৰিব লাগে। ইয়াৰ বাবে উত্তৰ প্ৰদেশ চৰকাৰেও ব্যৱস্থা কৰিছে। www.upstdc.co.in ৱেবছাইটত অনলাইন বুকিং কৰিব পাৰিব সকলোৱে।
