শুকুৰবাৰে ব্যস্ত গুৱাহাটী মহানগৰীৰ ফাঁচী বজাৰত জ্ঞানদীপ হাজৰিকা নামৰ এজন ডেলিভাৰী এজেণ্টক মাৰধৰ কৰাৰ লগতে অভব্য আচৰণ কৰা ধুৰন্ধৰ আৰক্ষী বিষয়া ভাৰ্গৱ বৰবৰাৰ বিৰুদ্ধে এজাহাৰ দাখিল কৰা হৈছে।
মহানগৰীৰ পাণবজাৰ থানাত দুজন যুৱকে নিলম্বিত আৰক্ষী বিষয়াগৰাকীৰ বিৰুদ্ধে এজাহাৰ দাখিল কৰে। ইয়াৰ উপৰি বোকাখাত থানাটো নিলম্বিত আৰক্ষী বিষয়াগৰাকীৰ বিৰুদ্ধে এজাহাৰ দাখি কৰা বুলি খবৰ আহিছে।
ইফালে আৰক্ষী বিষয়াগৰাকীৰ অভব্য আচৰণ কৰা কাৰ্যই ৰাজ্যজুৰি তীব্ৰ প্ৰতিক্ৰিয়াৰ সৃষ্টি হোৱাৰ সময়তে ঘটনা সন্দৰ্ভত নিজৰ স্থিতি স্পষ্ট কৰিছে মুখ্যমন্ত্ৰী ড০ হিমন্ত বিশ্ব শৰ্মাই।
সামাজিক মাধ্যমযোগে এটা প’ষ্ট শ্বেয়াৰ কৰি মুখ্যমন্ত্ৰী শৰ্মাই কয়, ‘অসম আৰক্ষীয়ে ৰাজপথত সাধাৰণ নাগৰিকৰ বিৰুদ্ধে অপ্ৰয়োজনীয়ভাৱে শক্তি প্ৰয়োগ কৰা উচিত নহয়৷ বিপৰীতে মৰ্যাদা আৰু সন্মানেৰে জনসাধাৰণক সেৱা আৰু সুৰক্ষা প্ৰদান কৰা শক্তিলৈ আৰক্ষী ৰূপান্তৰ হ’ব লাগিব। অনিয়ন্ত্ৰিত ক্ষমতাৰ সেই দিনবোৰ এতিয়া অতীত হ’ল। আৰক্ষীয়ে ৰক্ষা কৰিবলৈ লোৱা মানুহখিনিৰ বিৰুদ্ধে কৰ্তৃত্বৰ অপব্যৱহাৰ বা হিংসা সমাজে আৰু সহ্য নকৰে। আৰক্ষীয়ে সংস্কাৰ, জবাবদিহিতা আৰু মমত্বক আঁকোৱালি লোৱাৰ সময় আহি পৰিছে। লগতে, এই মূল্যবোধসমূহক সঁচা অৰ্থত ৰক্ষা কৰা শক্তি এটাৰ বাবে নতুন পথ সৃষ্টি কৰিবলৈ খোজ দিয়াৰ সময় আহি পৰিছে।’
উল্লেখ্য যে শুকুৰবাৰে ‘ডেলিভাৰী এজেণ্ট’ ৰূপে কৰ্মৰত কটন বিশ্ববিদ্যালয়ৰ ছাত্ৰ জ্ঞানদীপ হাজৰিকাক পাণবজাৰ আৰক্ষী থানাৰ ভাৰপ্ৰাপ্ত বিষয়া ভাৰ্গৱ বৰবৰাই কৰাই অমানবীয় নিৰ্যাতন চলোৱাৰ দৃশ্য ভাইৰেল হৈ পৰিছিল।
এই ঘটনাৰ পিছতেই আৰক্ষী সঞ্চালক প্ৰধান জি পি সিঙে তাতক্ষণিকভাৱে কাৰ্যকৰী হোৱাকৈ ভাৰ্গৱ বৰবৰাক নিলম্বন কৰাৰ নিৰ্দেশ দিয়ে।
ছাত্ৰজনক ৰাজপথত মুকলিকৈ মাৰধৰ কৰা আৰু মৃত্যুৰ ভাবুকি প্ৰদান কৰাৰ বিষয়টোৱে তীব্ৰ চৰ্চা লাভ কৰাৰ লগতে নিলম্বিত আৰক্ষী বিষয়াগৰাকীক দৃষ্টান্তমূলক শাস্তি প্ৰদান কৰাৰ দাবী জনাইছে বিভিন্ন দল-সংগঠনে।
আৰক্ষীৰ পোছাকত দাগ লগোৱা দানৱৰূপী আৰক্ষী বিষয়াগৰাকীৰ বিৰুদ্ধে আৰক্ষীয়ে কি ব্যৱস্থা গ্ৰহণ কৰে সেয়া পৰৱৰ্তী সময়ত লক্ষ্যণীয় হ’ব।
