দেওবাৰে উত্তৰ প্ৰদেশৰ সম্ভলত সংঘটিত হয় এক তীব্ৰ হিংসাত্মক ঘটনা। জামা মছজিদৰ জৰীপৰ বিৰোধিতা কৰা প্ৰতিবাদকাৰী আৰু আৰক্ষীৰ মাজৰ সংঘৰ্ষত ৫ জন লোকৰ প্ৰাণহানি হোৱাৰ লগতে ২০ গৰাকী নিৰাপত্তাৰক্ষী আৰু ৪ গৰাকী প্ৰশাসনৰ জোৱান আৰু বহু লোক আহত হয়। ইয়াৰ মাজতে শিল-ইটা নিক্ষেপ কৰা হয়, প্ৰতিবাদকাৰীয়ে গাড়ীত জুই লগাই আৰক্ষীৰ ওপৰত শিলগুটি নিক্ষেপ কৰে, ইয়াৰ পিছতে আৰক্ষীয়ে কন্দুৱা গেছ আৰু লাঠিৰ সহায়ত ৰাইজক ছত্ৰভংগ দিয়ায়।
উত্তৰ প্ৰদেশৰ সম্ভলস্থিত শ্বাহী জামা মছজিদৰ জৰীপক লৈ হুলস্থুলীয়া পৰিবেশৰ সৃষ্টি হয়। আদালতৰ নিৰ্দেশৰ পিছতেই দেওবাৰে পুৱা সম্ভলৰ জামা মছজিদত জৰীপ কৰিবলৈ উপস্থিত হোৱা দলটোক আক্ৰমণ কৰে একাংশ লোকে। এই সমগ্ৰ অঞ্চলটোত ভাৰতীয় ন্যায়িক সংহিতাৰ ১৬৩ ধাৰা কাৰ্যকৰী কৰা হৈছে, যাৰ অধীনত ৫ জন বা তাতকৈ অধিক লোকৰ সমাগম হোৱাত নিষেধাজ্ঞা আৰোপ কৰা হৈছে। দুষ্কৃতিকাৰীক ছত্ৰভংগ দিবলৈ আৰক্ষীয়ে কন্দুৱা গেছও এৰি দিয়ে।
সম্ভলৰ হিংসাত্মক ঘটনা সন্দৰ্ভত বিজেপি চৰকাৰ আৰু প্ৰশাসনৰ বিৰুদ্ধে বৃহৎ অভিযোগ উত্থাপন কৰিছে সমাজবাদী পাৰ্টিৰ সভাপতি অখিলেশ যাদৱে। ইতিমধ্যে উৰাবাতৰি বন্ধ কৰিবলৈ সম্ভলত ইণ্টাৰনেটো বন্ধ কৰি দিয়া হৈছে। সম্ভালৰ জামা মছজিদৰ জৰীপক লৈ সৃষ্টি হোৱা হুলস্থুলীয়া পৰিবেশৰ পাছত মোৰাদাবাদ সংমণ্ডলৰ আটাইকেইখন জিলাৰ আৰক্ষী বাহিনীয়ে সম্ভালত শিবিৰ পাতিছে।
আমৰোহা, মোৰাদাবাদ আৰু ৰামপুৰ জিলাৰ আৰক্ষী বাহিনীয়ে উত্তেজনাপূৰ্ণ অঞ্চলটোত শিবিৰ পাতিছে।সংবাদ মাধ্যমৰ খবৰ অনুসৰি, এই হিংসাত্মক ঘটনাৰ সময়তেই গুলীবিদ্ধ হৈ এজন যুৱকৰ প্ৰাণহানি হয়। আহত উপ-কালেক্টৰ ৰমেশ বাবু, এছ পি পি আৰ অ’ সঞ্জীৱ কুমাৰ আৰু কনিষ্টবল আশীষ ভাৰ্মা।
সম্ভলৰ হিংসাত্মক পৰিস্থিতিৰ মাজতে সৰ্বভাৰতীয় মুছলিম জামাতৰ ৰাষ্ট্ৰীয় সভাপতি মৌলানা চাহাবুদ্দিন ৰাজৱী বাৰেলৱীয়ে সম্ভলৰ বিশেষ জনগোষ্ঠীৰ জনসাধাৰণক শান্তি আৰু সম্প্ৰীতি বজাই ৰাখিবলৈ আহ্বান জনায়। মৌলানাই কৈছে যে হজৰত ইছলামে শান্তিৰ বাৰ্তা দিয়ে। সেয়েহে ইছলামে শান্তিৰ ওপৰত কাম কৰা উচিত। সম্ভলৰ জামা মছজিদ এখন ঐতিহাসিক মছজিদ। ইয়াৰ বাবে আইনী যুঁজ জোৰদাৰভাৱে কৰা হ’ব।
