এতিয়াৰে পৰা যদি কোনো কাৰণ নোহোৱাকৈ ৰে’লৰ চেইন টানে, তেন্তে অত্যধিক জৰিমনা ভৰিবলৈ সাজু হওক। অৰ্থাত এতিয়াৰে পৰা অনাহকত চেইন টনাটো আপোনাৰ বাবে হ’ব ব্যয়বহুল। অনাহকত চেইন টানি ধৰা পৰিলে ৫০০ টকা জৰিমনাৰ লগতে ভৰিব লাগিব ডিটেনচন চাৰ্জো। ডিটেনচন চাৰ্জ হিচাপে প্ৰতি মিনিটত দিব লাগিব ৮ হাজাৰ টকা। ইয়াৰ উপৰি ৫০০ টকা জৰিমনা হিচাপে দিব লাগিব।
অনাহকত চেইন টনাৰ ফলত যদি ৰে’লখন ৮ মিনিটৰ বাবে ৰৈ যায় তেন্তে আপুনি ৬৪ হাজাৰ টকা আৰু ৫০০ টকা সাধাৰণ জৰিমনা হিচাপে দিব লাগিব।
এই সন্দৰ্ভত ৰে’লৱেৰ এজন শীৰ্ষ বিষয়াই জনোৱা মতে, চেইন টনাৰ পিছত ৰে’লখন পুনৰ চলিবলৈ প্ৰায় ৫-৭ মিনিট সময় লাগে। এই সময়ছোৱাত ৰে’লৱেই বৃহৎ লোকচানৰ সন্মুখীন হ’বলগীয়া হয়। এতিয়ালৈকে ইয়াৰ বাবে মাত্ৰ ৫০০ টকা জৰিমনা বিহাৰ ব্যৱস্থা আছিল যদিও এই সন্দৰ্ভত ডাঙৰ পৰিৱৰ্তন অনা হৈছে।
ভোপাল সংমণ্ডল ৰে’লৱেৰ পৰিচালক দেৱাশীষ ত্ৰিপাঠীয়ে কয় যে পশ্চিম ৰে’লৱেৰ ভোপাল সংমণ্ডলত ৬ ডিচেম্বৰৰ পৰা এই নিয়ম কাৰ্যকৰী কৰা হৈছে। যোৱা ৩ মাহত ভূপাল ৰে’লৱে সংমণ্ডলত চেইন টনা সন্দৰ্ভত ১২৬২ টা গোচৰত ব্যৱস্থা গ্ৰহণ কৰা হৈছে।
ৰে’লৱে আইনৰ ১৪১ ধাৰাৰ অধীনত এই ধৰণৰ ঘটনাত এতিয়ালৈকে ২ লাখ ৯০ হাজাৰ ৭৭৫ টকা জৰিমনা আদায় কৰা হৈছে। ৰে’লৱেৰ বিষয়াই জানিব দিয়া অনুসৰি, চেইন টনাৰ পিছত বহু যাত্ৰী ট্ৰেইনৰ পৰা পলাইও যায়।
অৱশ্যে নতুন নিয়ম অনুসৰি, চেইন টনাৰ পিছত ৰে’লৰ পৰা পলাই যোৱা যাত্ৰীসকলৰ বিৰুদ্ধেও বেলেগকৈ জৰিমনাৰ ব্যৱস্থা গ্ৰহণ কৰাৰ সিদ্ধান্ত গ্ৰহণ কৰিছে। এইধৰণৰ যাত্ৰীসকলক চেইন টনাৰ সময়ত ৰে’লত উঠা বা নমাৰ পৰা বিৰত থাকিবলৈও আহ্বান জনায়।
