বৰ্তমান ছিৰিয়াত পৰিস্থিতি অস্থিৰ। ছিৰিয়াৰ ৰাজধানী দামাস্কাছত চলিছে বিদ্ৰোহীৰ আক্ৰমণ। দামাস্কাছৰ চিডানিয়া কাৰাগাৰত আক্ৰমণ কৰে বিদ্ৰোহীয়ে।
বাছাৰ আল আছাদৰ বিৰোধীক এই কাৰাগাৰতে বন্দী কৰি ৰখা হৈছিল। বাছাৰ আছাদৰ সেনাৰ টেংক দখল কৰে বিদ্ৰোহীয়ে।
দামাস্কাছৰ ৰাজপথত এতিয়াও অব্যাহত আছে যুদ্ধ। ইয়াৰ পৰাই এই আক্ৰমণৰ বহু ভিডিঅ’ পোহৰলৈ আহিছে। সংবাদ মাধ্যমৰ মতে, আকাশমাৰ্গৰ পৰাই আচৰিতভাৱে সন্ধানহীন হৈ পৰিছে ৰাষ্ট্ৰপতি বাছাৰ আছাদৰ লগতে পৰিয়ালবৰ্গ। অৱশ্যে বিমানখনত কোন কোন আছিল সেয়া জানিব পৰা হোৱা নাই।
সংবাদ মাধ্যমৰ মতে বাছাৰ আছাদে ৰাছিয়াত ক্ৰয় কৰিছিল এটা ঘৰ। এনে পৰিস্থিতিত বাছাৰ আছাদে পৰিয়ালৰ সৈতে ছিৰিয়া এৰি যোৱা বুলি অনুমান কৰা হৈছে।
উল্লেখ্য যে, ছিৰিয়াত বিদ্ৰোহীয়ে ব্যাপক আক্ৰমণ চলাইছে। চৰকাৰী নিয়ন্ত্ৰিত অঞ্চল দখল কৰিছে বিদ্ৰোহীয়ে। সংবাদ মাধ্যমৰ বাতৰি অনুসৰি, উত্তৰ আৰু পূব হোমছৰ চৰকাৰী প্ৰতিৰক্ষা ব্যৱস্থা ভাঙি বিদ্ৰোহীয়ে দামাস্কাছক ঘেৰি ধৰাৰ প্ৰক্ৰিয়াও আৰম্ভ কৰিছে।
ছিৰিয়াৰ প্ৰতিৰক্ষা সম্পত্তি দখল কৰিছে বিদ্ৰোহীয়ে। সেনাৰ টেংকবোৰ দখল কৰি ৰাষ্ট্রপতি ভৱনৰ ফালে টোৱাইছে৷ এনে পৰিস্থিতিত বাছাৰ আছাদৰ সকলো জোৱান পলাই গৈছে। ইয়াৰ পিছত বিদ্ৰোহীয়ে ৰাজধানীৰ বহু অঞ্চলো দখল কৰিছে।
ইফালে দামাস্কাছৰ পৰা এখন চৰকাৰী বিমান উৰা মাৰিছে। জল্পনা-কল্পনা কৰা হৈছিল যে, বাছাৰ আছাদে দেশ এৰি যোৱাৰ প্ৰস্তুতি চলাইছে। কিন্তু তেওঁৰ কাৰ্যালয়ে এই কথা অস্বীকাৰ কৰে। কোৱা হয় যে, বাছাৰ আছাদে নিজৰ সকলো দায়িত্ব পালন কৰি আছে। অৱশ্যে একাংশ সংবাদ মাধ্যমত দাবী কৰা হৈছে যে, বাছাৰ আছাদ চৰকাৰৰ বহু জ্যেষ্ঠ নেতাইও দেশ এৰি যাবলৈ সাজু হৈছে।
ইফালে তুৰ্কি আৰু ইৰানে নিজৰ অভিযান বন্ধ কৰাৰ সিদ্ধান্ত লৈছে। ছিৰিয়াৰ বিদ্ৰোহীসকলে দামাস্কাছত নিজৰ বিজয়ৰ উদযাপন আৰম্ভ কৰিছে। ইফালে ছিৰিয়াৰ পৰিস্থিতিৰ সন্দৰ্ভত আমেৰিকাৰ নৱনিৰ্বাচিত ৰাষ্ট্ৰপতি ড’নাল্ড ট্ৰাম্পে কয় যে আমেৰিকাৰ এই ঘটনাৰ সৈতে কোনো সম্পৰ্ক থকা উচিত নহয়।
