ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে দুৰ্নীতিৰ অভিযোগত দীৰ্ঘদিনৰ পৰা চলি থকা এটা গোচৰত মঙলবাৰে প্ৰথমবাৰৰ বাবে আদালতত উপস্থিত হৈ সাক্ষ্য দিয়ে। আন্তৰ্জাতিক অপৰাধ আদালতে গ্ৰেপ্তাৰী পৰোৱানা জাৰি কৰাৰ লগতে গাজাত অব্যাহত থকা যুদ্ধৰ সময়তে আদালতত উপস্থিত হৈ সাক্ষ্য দিয়া ঘটনাই বিশেষ চৰ্চা লাভ কৰিছে।
প্ৰথমবাৰৰ বাবে কোনো এজন ইজৰাইলৰ প্ৰধানমন্ত্ৰীয়ে আদালতৰ কক্ষত থিয় হৈ অপৰাধমূলক প্ৰতিবাদী হিচাপে সাক্ষ্য দিয়ে।
নেতান্যাহুৱে সাক্ষ্য দিবলৈ আৰম্ভ কৰাৰ লগে লগে ন্যায়াধীশসকলক ‘হেল্ল’ বুলি সম্বোধন কৰে। এজন ন্যায়াধীশে তেওঁক উদ্দেশ্যি কয় যে তেওঁৰ আন সাক্ষীৰ দৰেই বিশেষাধিকাৰ আছে আৰু তেওঁ ইচ্ছামতে বহিব বা থিয় হ’ব পাৰে।
টেল আভিভৰ এখন ভৰ্তি আদালতত নেতান্যাহুৱে কয়, ‘সঁচা কথা ক’বলৈ মই এই মুহূৰ্তটোৰ বাবে আঠ বছৰৰ অপেক্ষা কৰিছো।’
তেওঁ লগতে তেওঁৰ বিৰুদ্ধে উত্থাপিত অভিযোগক ‘অৰ্থহীনতাৰ ভঁৰাল’ বুলি অভিহিত কৰি প্ৰতিশ্ৰুতি দিয়ে যে তেওঁৰ বক্তব্যৰ পিছতে তেওঁৰ বিৰুদ্ধে থকা গোচৰটোৰ সমাপ্তি ঘটিব।
উল্লেখ্য যে, বেঞ্জামিন নেতান্যাহুৰ বিৰুদ্ধে ব্যক্তিগত আৰু ব্যৱসায়িক স্বাৰ্থত সহায়ৰ বিনিময়ত হলিউডৰ এজন কোটিপতি প্ৰযোজকৰ পৰা হাজাৰ হাজাৰ ডলাৰৰ চিগাৰ আৰু চেম্পেইন লোৱাৰ অভিযোগ উত্থাপিত হৈছিল।
