ইম্ফল পশ্চিমৰ চিংজামেই মায়েংবাম লেইকাইস্থিত এটা আইচিআইচিআই বেংকৰ বাহিৰত বুধবাৰে এটা হেণ্ড গ্ৰেনেড উদ্ধাৰ হোৱা বুলি জানিব পৰা গৈছে। ইফালে বিষ্ণুপুৰ জিলাৰ নামবোলৰ কংলা ফুডছতো আন এক অনুৰূপ বিস্ফোৰক সামগ্ৰী উদ্ধাৰ হোৱা বুলি আৰক্ষীয়ে জানিবলৈ দিয়ে।
মণিপুৰ চৰকাৰে ধন দাবীৰ বিৰুদ্ধে যুঁজিবলৈ সতৰ্কতামূলক ব্যৱস্থা বৃদ্ধি কৰাৰ সময়তে এই বিস্ফোৰক সামগ্ৰী উদ্ধাৰক কেন্দ্ৰ কৰি তীব্ৰ প্ৰতিক্ৰিয়াৰ সৃষ্টি হৈছে অশান্তজৰ্জৰ মণিপুৰত।
আইচিআইচিআই বেংকৰ শাখাৰ মূল দুৱাৰলৈ যোৱা চিৰিত গ্ৰেনেড থৈ দিয়াৰ খবৰ পোৱাৰ পিছতে চিংজামেই থানাৰ মহকুমা আৰক্ষী বিষয়া (এছডিপিঅ’)ৰ নেতৃত্বত এটা দলে ততাতৈয়াকৈ ঘটনাস্থলত উপস্থিত হৈ অভিযান চলায়।
গ্ৰেনেডটো উদ্ধাৰৰ বাবে আৰক্ষীয়ে ঘটনাস্থললৈ বোমা নিষ্কাশন দলক মাতি আনে আৰু দলটোৱে পুৱা ১০ বজাৰ ভিতৰত তেওঁলোকে নিৰাপদে গ্ৰেনেডটো উদ্ধাৰ কৰে বুলি জানিব পৰা গৈছে।
অধিক তদন্ত আৰু আইনী ব্যৱস্থাৰ বাবে এটা গোচৰ ৰুজু কৰা হৈছে। সম্প্ৰতি আৰক্ষীয়ে ঘটনাটোৰ আঁৰত কোন শক্তি জড়িত হৈ আছে কি কাৰণত এই কাণ্ড সংঘটিত কৰিছে সেই ৰহস্য উদঘাটনৰ বাবে তদন্ত অব্যাহত ৰাখিছে।
