অহা বছৰ দিল্লীত অনুষ্ঠিত হ’বলগীয়া বিধানসভা নিৰ্বাচনৰ বাবে প্ৰস্তুতি আৰম্ভ কৰিছে প্ৰতিটো ৰাজনৈতিক দলে। ইতিমধ্যে তিনিটা ডাঙৰ দল বিজেপি, কংগ্ৰেছ আৰু আম আদমী পাৰ্টিয়ে নিৰ্বাচনৰ বাবে কুচকাৱাজ আৰম্ভ কৰিছে।
সূত্ৰ অনুসৰি শাসনাধিষ্ঠ আপক পৰাভূত কৰিবলৈ বিজেপিৰ মিত্ৰ দল জনতা দল ইউনাইটেড (জেডিইউ) আৰু লোক জনশক্তি পাৰ্টিয়েও নিৰ্বাচনত অৱতীৰ্ণ হ’ব পাৰে। ইয়াৰ আঁৰৰ কাৰণ হ’ল এইবাৰ দিল্লী বিধানসভা নিৰ্বাচনত পূৰ্বাঞ্চল আৰু বিহাৰী ভোটাৰক লৈ চলা যথেষ্ট চৰ্চা।
সূত্ৰৰ পৰা লাভ কৰা তথ্য অনুসৰি, নীতিশ কুমাৰ নেতৃত্বাধীন জেডিইউয়ে দুখন আসনত অৱতীৰ্ণ হোৱাৰ বিপৰীতে এলজেপি (ৰাম বিলাস)ই এখন আসনত অৱতীৰ্ণ হ’ব পাৰে। দিল্লীৰ বুৰাড়ী আৰু সংগম বিহাৰ বিধানসভাৰ আসনৰ পৰা প্ৰতিদ্বন্দ্বিতা কৰিব পাৰিব জেডিইউৰ প্ৰাৰ্থীয়ে। অৱশ্যে ইয়াৰ চূড়ান্ত সিদ্ধান্ত এতিয়াও লোৱা হোৱা নাই যদিও শীঘ্ৰে এই সন্দৰ্ভত জেডিইউ আৰু বিজেপি নেতাৰ বৈঠক অনুষ্ঠিত হোৱাৰ সম্ভাৱনা আছে।
উল্লেখ্য যে, বুৰাড়ী বিধানসভাৰ আসনৰ পৰা জেডিইউৰ প্ৰাৰ্থীয়ে নিৰ্বাচনত অৱতীৰ্ণ হ’ব পাৰে। ইয়াত আম আদমি পাৰ্টিৰ সঞ্জীৱ ঝাই যোৱা ২০২০ চনৰ বিধানসভা নিৰ্বাচনত জয়ী হৈছিল। তেওঁ ১৩৯,৫৯৮টা ভোট লাভ কৰাৰ বিপৰীতে জে ডি ইউৰ শৈলেন্দ্ৰ কুমাৰে ৫১,৪৪০টা আৰু এছ এইচ এছৰ ধৰমবীৰে ১৮,০৪৪টা ভোট লাভ কৰে।
দিল্লীত আম আদমি পাৰ্টিৰ চৰকাৰ। বিজেপিয়ে পূৰ্বাঞ্চলী আৰু বিহাৰীক অপমান কৰাৰ অভিযোগ উত্থাপন কৰিছে আপে। অৱশ্যে আপৰ অভিযোগ প্ৰতিহত কৰাত বিজেপিও এতিয়া অতি আগ্ৰাসী হৈ পৰিছে। আপক প্ৰত্যুত্তৰত কয় যে বিহাৰৰ উপ-মুখ্যমন্ত্ৰী সম্ৰাট চৌধুৰীয়ে কয় যে অৰবিন্দ কেজৰিৱালে কৰ’ণাৰ সময়ত বিহাৰীবাসীক উভতি যাবলৈ কৈছিল। বিহাৰৰ ৰাইজক কেজৰিৱালৰ জালত নপৰিবলৈও আহ্বান জনাইছে সম্ৰাট চৌধুৰীয়ে।
