চৰকাৰৰ কোটি কোটি টকা ব্যয় সাপেক্ষে নিৰ্মাণ কৰা ৰূপসী বিমানবন্দৰ পুনৰ পৰিত্যক্ত হৈ পৰিব নেকি? বিগত কিছুদিনৰ পৰা অঞ্চলবাসীক এই প্ৰশ্নই চিন্তিত কৰি তুলিছে। কিন্তু এই ক্ষেত্ৰত নীৰৱ বিটিচি তথা ৰাজ্য চৰকাৰ।
ধুবুৰীকে ধৰি পশ্চিম অসমৰ ৰাইজৰ দীৰ্ঘদিনীয়া সপোন বাস্তবায়িত কৰি ৩৯ বছৰীয়া অপেক্ষাৰ পিছত পুনৰ যাত্ৰীবাহী বিমান পৰিসেৱা আৰম্ভ হোৱা ৰূপসী বিমানবন্দৰৰ পৰা বিগত ২০০ দিনে চলাচল কৰা নাই বিমান।
ইপিনে, এলায়েন্স এয়াৰে যোৱা মে’ মাহত বিমান চলোৱাৰ কথা ঘোষণা কৰিছিল যদিও সেয়া ২২ জুনৰ পৰা ৰূপসী-কলিকতাৰ মাজত চলাব বুলি আনুষ্ঠানিকভাবে প্ৰচাৰ কৰিছিল। কিন্তু শনিবাৰে অৰ্থাৎ ২২ জুনত যাত্ৰীয়ে টিকট কাটি বিমান পৰিসেৱা নোপোৱাৰ ফলত জাঙুৰ খাই উঠিছে।
বিমানবন্দৰ কৰ্তৃপক্ষৰ মতে এলায়েন্স এয়াৰৰ কোনো গ্ৰাউণ্ড ষ্টাফ এতিয়ালৈকে আহি নোপোৱাৰ ফলত বিমান চলাচলৰ সম্ভাৱনা নাই। গ্ৰাউণ্ড ষ্টাফ কেতিয়া আহিব সেই বিষয়তো কৰ্তৃপক্ষৰ হাতত নাই কোনো তথ্য।
চৰকাৰী ভৰ্তুকিৰে চলাচল কৰা বিমান সেৱা গুৱাহাটী-ৰূপসী-কলিকতা বন্ধ হৈ থকাৰ অন্তৰালৰ প্ৰকৃত কাৰণ চৰকাৰে এতিয়ালৈকে আনুষ্ঠানিকভাৱে অৱগত নকৰাক কেন্দ্ৰ কৰি ক্ষুদ্ধ হৈ উঠিছে অঞ্চলবাসী।
ইফালে ধুবুৰী আৰু কোকৰাঝাৰৰ পৰা দিল্লীলৈ নিৰ্বাচিত সাংসদ সকলৰ উক্ত বিষয়ত নিৰৱতাই স্থানীয় ৰাইজক হতাশ কৰি তুলিছে।
উল্লেখ্য যে, কেন্দ্ৰীয় চৰকাৰৰ ‘উড়ান-২’ আৰু ‘উড়ান-৪’ নামৰ আঁচনিৰ অধীনৰ নতুনকৈ নিৰ্মাণ কৰা হৈছিল ৰূপসী বিমানবন্দৰটো। ৰূপসী বিমানবন্দৰৰ পৰা কলিকতা আৰু গুৱাহাটীলৈ বিমান সেৱা ‘ফ্লাই বিগে’ আৰম্ভ কৰাৰ পিছৰ পৰাই উত্তৰ-পূবৰ নতুন বিমান বন্দৰৰ ভিতৰত সকলোতকৈ অধিক যাত্ৰী ৰূপসী বিমানবন্দৰৰ পৰা যাত্ৰা কৰিছিল।
