আয়াৰলেণ্ডৰ বিৰুদ্ধে অনুষ্ঠিত হোৱা তৃতীয়খন এদিনীয়া মেচত ভাৰতীয় মহিলা বেটাৰ স্মৃতি মান্ধানাই নিজৰ এদিনীয়া কেৰিয়াৰৰ দশমটো শতক অৰ্জন কৰি এক বিশেষ অভিলেখ গঢ়িবলৈ সক্ষম হয়। মহিলা এদিনীয়া ক্ৰিকেটত দহটা শতক অৰ্জন কৰা প্ৰথমগৰাকী ভাৰতীয় ক্ৰিকেটাৰত পৰিণত হয় মান্ধানা।
ইয়াৰ উপৰি, এই মেচখনতেই মান্ধানাই ভাৰতৰ হৈ দ্ৰুত শতক অৰ্জন কৰা ক্ৰিকেটাৰতো পৰিণত হয়। মান্ধানাই ৭০টা বলত কেৰিয়াৰৰ দশমটো শতক অৰ্জন কৰে। এই ক্ষেত্ৰত মান্ধানাই ভংগ কৰে হৰমনপ্ৰীত কৌৰৰ অভিলেখ।
আয়াৰলেণ্ডৰ বিৰুদ্ধে তৃতীয়খন মেচত মান্ধানাই ৮০টা বলত ১৩৫ ৰানৰ বিস্ফোৰক ইনিংছ খেলে। এই ইনিংছটোত আছিল ১২টা চাৰি আৰু ৭টা ছয়।
অধিনায়ক মান্ধানাৰ বিস্ফোৰক ইনিংছৰ সহায়তেই ভাৰতীয় মহিলা দলটোৱে ৪৩৫ ৰানৰ বিশাল স্ক’ৰ কৰিবলৈ সক্ষম হয়। মহিলা এদিনীয়া ক্ৰিকেট ইতিহাসত ভাৰতৰ এয়া সৰ্বোচ্চ স্ক’ৰ।
মহিলা এদিনীয়া ক্ৰিকেটত সৰ্বাধিক শতক
১৫- মেগ লেনিং
১৩- ছুজী বেটছ
১০-টেমী বিউমোণ্ট
১০- স্মৃতি মান্ধানা
৯- চমাৰী আটাপাট্টু
৯- চাৰ্লোট এডৱাৰ্ডছ
৯- নেট ছাইবাৰ ব্ৰণ্ট
মহিলা এদিনীয়া ক্ৰিকেটত ভাৰতৰ হৈ দ্ৰুত শতক অৰ্জন কৰা ক্ৰিকেটাৰ
স্মৃতি মান্ধানা- ৭০টা বল, আয়াৰলেণ্ড (২০২৫)
হৰমনপ্ৰীত কৌৰ- ৮৭টা বল, দক্ষিণ আফ্ৰিকা (২০২৪)
হৰমনপ্ৰীত কৌৰ- ৯০টা বল, অষ্ট্ৰেলিয়া (২০১৭)
জেমিমা ৰড্ৰিগেজ- ৯০টা বল, আয়াৰলেণ্ড (২০২৫)
ইফালে এদিনীয়াত ভাৰতৰ সৰ্বোচ্চ স্ক’ৰ
আয়াৰলেণ্ডৰ বিৰুদ্ধে ৪৩৫ (২০২৫)
আয়াৰলেণ্ডৰ বিৰুদ্ধে ৩৭০/৫ (২০২৫)
আয়াৰলেণ্ডৰ বিৰুদ্ধে ৩৫৮/২ (২০১৭)
ৱেষ্টইণ্ডিজৰ বিৰুদ্ধে ৩৫৮/৫ (২০২৪)
এছিয়াৰ আটাইতকৈ সফল মহিলা ক্ৰিকেটাৰ
এদিনীয়া কেৰিয়াৰত নিজৰ দশমটো শতক অৰ্জন কৰা মান্ধানা কেৱল একমাত্ৰ ভাৰতীয় মহিলাই নহয় তেওঁ লগতে এছিয়া মহাদেশৰ ভিতৰতো সৰ্বাধিক শতক অৰ্জন কৰা ক্ৰিকেটাৰত পৰিণত হয়।
