হাৰিয়ানাৰ ফৰিদাবাদৰ পৰা পোহৰলৈ আহিছে এক নাভূত-নাশ্ৰুত ঘটনা। জানিব পৰা অনুসৰি, চোৰে এজন ব্যৱসায়ীৰ ঘৰৰ পৰা চুলি চুৰি কৰিছে, যাৰ মূল্য ৭ লাখ টকা বুলি অনুমান কৰা হৈছে।
ইয়াৰ উপৰি চোৰে বাসগৃহত থকা দুই লাখ ১৩ হাজাৰ টকাৰ নগদ ধনো লৈ যায়। সমগ্ৰ ঘটনাটো চিচিটিভিত বন্দী হৈছে।
অভিযোগকাৰী ৰঞ্জিত মণ্ডলে কয় যে তেওঁৰ ঘৰত চুৰি হৈছে। চুৰি কাণ্ডত ৭ লাখ টকাৰ মহিলাৰ পুৰণি চুলি চুৰি হয়। ব্যৱসায়ী মণ্ডলে কয় যে তেওঁ পুৰণি চুলি ক্ৰয়-বিক্ৰয়ৰ কাম কৰে।
উল্লেখ্য যে, ১৪-১৫ জানুৱাৰীৰ নিশা ২:৩০ বজাৰ পৰা ৩:০০ বজাৰ ভিতৰত চোৰে ব্যৱসায়ীজনৰ ঘৰত প্ৰৱেশ কৰি এটা কোঠাৰ তলা ভাঙি প্ৰায় ১৫০ কিলোগ্ৰাম মহিলাৰ চুলি চুৰি কৰি লৈ যায়। চুৰি হোৱা চুলিখিনিৰ বজাৰ মূল্য প্ৰায় ৭ লাখ টকা।
ইয়াৰ উপৰি চোৰে এটা বেগত ৰখা ২ লাখ ১৩ হাজাৰ নগদ ধনো চুৰি কৰি লৈ যায়। ব্যৱসায়ী মণ্ডলে জানিব দিয়া মতে, ঘটনাৰ সময়ত ঘৰৰ সকলোৱে শুই আছিল। ঘৰত সংস্থাপন কৰি ৰখা চিচিটিভিত স্পষ্ট হয় যে ঘটনাটো সংঘটিত কৰিছে তিনিৰ পৰা চাৰিজন চোৰে।
ব্যৱসায়ী ৰঞ্জিত মণ্ডলে কয় যে তেওঁৰ এই চুলি ব্যৱসায় উইগ আৰু হেয়াৰ এক্সটেনচনৰ দৰে সামগ্ৰী উৎপাদনত ব্যৱহাৰ কৰা হয়।
ঘটনা সংঘটিত হোৱাৰ পিছত আৰক্ষীৰ ওচৰত দাখিল কৰা এজাহাৰৰ ভিত্তিত আৰক্ষীয়ে তদন্ত আৰম্ভ কৰিছে আৰু চিচিটিভি ফুটেজৰ ভিত্তিত চোৰকেইটাক চিনাক্ত কৰাৰ প্ৰচেষ্টা অব্যাহত ৰাখিছে।
