বলীউড অভিনেতা ছেইফ আলী খানক আক্ৰমণ কৰা অভিযুক্ত বাংলাদেশী বুলি প্ৰমাণ পোৱাৰ পিছতে দেশৰ প্ৰায়বোৰ ৰাজ্য সতৰ্ক হোৱা পৰিলক্ষিত হৈছে। দিল্লীৰ উপ-ৰাজ্যপাল ভি কে ছাক্সেনাই আৰক্ষী আয়ুক্তলৈ পত্ৰ লিখি অবৈধ বাংলাদেশীৰ বিৰুদ্ধে অভিযান আৰম্ভ কৰিবলৈ নিৰ্দেশ প্ৰকাশ কৰিছে।
উপৰাজ্যপালগৰাকীয়ে কয় যে দিল্লীত সংঘটিত হৈ থকা অপৰাধৰ আঁৰতো হয়তো অবৈধ বাংলাদেশী জড়িত হ’ব পাৰে। গতিকে দিল্লী আৰক্ষীয়ে অবৈধ বাংলাদেশীৰ বিৰুদ্ধে অভিযান আৰম্ভ কৰি তদন্ত কৰিব লাগে।
ৰাষ্ট্ৰীয় ৰাজধানীত বসবাস কৰা বাংলাদেশী আৰু ৰোহিংগীয়া ‘অনুপ্ৰৱেশকাৰী’ক চিনাক্তকৰণৰ বাবে ‘বিশেষ অভিযান’ আৰম্ভ কৰিবলৈ দিল্লী আৰক্ষী আয়ুক্তক নিৰ্দেশ দিছে ভি কে ছাক্সেনাই।
আয়ুক্তলৈ লিখা এখন পত্ৰত কোৱা হৈছে যে উপ-ৰাজ্যপালগৰাকীয়ে এটা “গুৰুতৰ অপৰাধমূলক কাণ্ড”ৰ কথা উল্লেখ কৰিছে, য’ত এজন বাংলাদেশী নাগৰিকে ঘৰ ভাঙি অপৰাধমূলক আক্ৰমণৰ সৈতে জড়িত হোৱাৰ অভিযোগ উত্থাপন কৰিছে।
পত্ৰখনত উল্লেখ কৰা অনুসৰি যোৱা ১৬ জানুৱাৰীত ছেইফ আলী খানক মুম্বাইৰ ফ্লেটত একাধিকবাৰ ছুৰীৰে আঘাত কৰা অভিযুক্তজনে ভুৱা পৰিচয়ৰ অধীনত বাস কৰিছিল আৰু ৰেষ্টুৰেণ্টত কৰ্মৰত আছিল।
উপ-ৰাজ্যপালৰ প্ৰধান সচিবে লিখা পত্ৰখনত কোৱা হৈছে যে এনে অবৈধ অনুপ্ৰৱেশকাৰীক প্ৰায়ে দোকান বা অন্যান্য বাসিন্দাসকলে শ্ৰমিক আৰু ঘৰুৱা সহায়ক হিচাপে নিয়োজিত কৰি নিৰ্ধাৰিত নূন্যতম মজুৰিতকৈ কম মজুৰিৰে নিয়োগ কৰে।
উপ-ৰাজ্যপালগৰাকীয়ে কয়, ‘আধাৰ কাৰ্ড, ভোটাৰ আই ডি কাৰ্ড, ৰেচন কাৰ্ডৰ দৰে ভুৱা নথি-পত্ৰৰ ভিত্তিত এনে অনুপ্ৰৱেশকাৰীক সংস্থাপন আৰু সংস্থাপনৰ সুবিধা প্ৰদান কৰা সংগঠিত ছিণ্ডিকেট আৰু ন্যস্ত স্বাৰ্থজড়িত গোট আছে বুলিও পৰ্যবেক্ষণ কৰা হৈছে। অবৈধ বাংলাদেশী আৰু ৰোহিংগীয়া প্ৰব্ৰজনকাৰীক অবৈধ কাৰ্যকলাপৰ সৈতে জড়িত কৰাটো নুই কৰিব নোৱাৰি, আৰু মিছন মোডত এনে ‘অনুপ্ৰৱেশকাৰী’ক চিনাক্ত কৰাৰ বাবে বিশেষ অভিযান আৰম্ভ কৰিব লাগে।’
