ক্রিষ্টিয়ানো ৰোনাল্ডো! বিশ্ব ফুটবলৰ বাবে এটা চিৰ পৰিচিত নাম চি আৰ ছেভেন অৰ্থাৎ ক্রিষ্টিয়ানো ৰোনাল্ডো। ৰোনাল্ডোৰ ভৰিৰ যাদু চাবলৈ ভাল নোপোৱা ফুটবল অনুৰাগী হয়তো বিশ্বত কমেই ওলাব।
কিন্তু চলিত ইউৰো কাপত সোমবাৰে নিশা শ্লোভেনিয়াক পৰাস্ত কৰাৰ পিছতে সকলোকে আচৰিত কৰি ইউৰো কাপৰ পৰা অৱসৰ ঘোষণা কৰিলে পৰ্টুগালৰ তাৰকা ক্রিষ্টিয়ানো ৰোনাল্ডোৱে।
অৱশ্যে বহু লোকে এইখনেই যে ৰোনাল্ডোৰ শেষ ইউৰো সেই কথা পূৰ্বেই ধাৰণা কৰিছিল যদিও টাইব্ৰেকাৰত শ্লোভেনিয়াক পৰাস্ত কৰি পৰ্টুগালে ইউৰোপৰ সৰ্বশ্ৰেষ্ঠ ফুটবল মহাৰণখনৰ কোৱাৰ্টাৰ ফাইনেলত প্ৰৱেশ কৰাৰ পিছতেই যে এই আনুষ্ঠানিক ঘোষণা আহিব সেই কথা কোনেও কল্পনা কৰা নাছিল।
শ্লোভেনিয়াৰ বিৰুদ্ধে মেচখনত এইবাৰৰ ইউৰো ২০২৪ৰ অন্যান্য মেচ সমূহতকৈ অধিক প্ৰাণৱন্ত ৰূপত দেখা গৈছিল ৰোনাল্ডোক। কিন্তু সুযোগ কাৰ্য্যকৰী কৰাত বাৰে বাৰে ব্যৰ্থ হৈছিল ৰোনাল্ডো। এই ব্যৰ্থতা হতাশালৈ ৰূপান্তৰিত হৈছিল যেতিয়া খেলৰ অতিৰিক্ত সময়ৰ প্ৰথম হাফত পেনাল্টিত স্কোৰ কৰিবলৈ সক্ষম নহ’ল ৰোনাল্ডো। ষ্টেডিয়ামত বহি থকা দৰ্শকৰ মুখতো স্পষ্ট হৈছিল হতাশা।
আন্ত:ৰাষ্ট্ৰীয় সংবাদ মাধ্যমে প্ৰকাশ কৰা এখন ফটোত এটা বিশেষ জাৰ্চিত ৰোনাল্ডোৰ এজন সমৰ্থকক দেখা গৈছে আৰু জাৰ্চিটোত লিখা আছে, ‘২০ বছৰ ধৰি আপোনাৰ ফেন হৈ আছিলো। কিন্তু আজি নিশা নহয়’। অনুৰাগীৰ এনে হতাশাৰ বিপৰীতে ফিল্ডত উচুপি উঠিছিল ৰোনাল্ডো। সতীৰ্থই সান্তনা দিব লগীয়া হৈছিল ক্রিষ্টিয়ানো ৰোনাল্ডোক।
দুটা দশক ধৰি বিশ্বৰ কোটি কোটি ফুটবলপ্ৰেমীক মোহাচ্ছন্ন কৰি অহা মহাতাৰকাজনে যেন বুজি উঠিছিল-সময় সমাগত।
উল্লেখ্য যে কালি শ্লোভেনিয়াৰ বিৰুদ্ধে মেচখনত পৰ্টুগালৰ গ’লকীপাৰ কোষ্টাই টাই ব্ৰেকাৰত প্ৰথম তিনিটা শ্বট ৰক্ষা কৰি পৰ্তুগালৰ বিজয়ত মুখ্য ভূমিকা পালন কৰে। অৱশ্যে প্ৰথমে ব্যৰ্থতা স্বত্বেও ৰোনাল্ডো, ব্ৰুনো ফাৰ্নাণ্ডেছ আৰু ছিলভাৰ গ’লেৰে কোৱাৰ্টাৰ ফাইনেলত প্ৰৱেশ কৰে পৰ্টুগাল।
কোৱাৰ্টাৰত পৰ্টুগাল মুখামুখি হ’ব ফ্ৰাঞ্চৰ। ৰোনাল্ডোই এতিয়ালৈকে পৰ্টুগালৰ বাবে ২১০খন খেলত ১৩০টা গ’ল স্কোৰ কৰাৰ লগতে ৪৭টা এচিষ্ট কৰিছে। ইয়াৰ উপৰি ইউৰোত ১৪টা গ’লেৰে সৰ্বাধিক স্ক’ৰাৰৰ তালিকাৰ শীৰ্ষত আছে ৰোনাল্ডো।
কিন্তু সকলো ফুটবল অনুৰাগীৰ মনত এটাই প্ৰশ্ন- এমবাপেৰ দৰে তাৰকা সমৃদ্ধ ফান্সৰ বিপক্ষে সফল হ’বনে চি আৰ ছেভেন? সুখকৰ বিদায় সম্ভৱ হ’ব নে বিশ্বতাৰকা ক্রিষ্টিয়ানো ৰোনাল্ডোৰ?
