১৯৮৪ শিখ বিৰোধী সংঘৰ্ষৰ সৈতে জড়িত গোচৰত দিল্লীৰ ৰাউজ এভিনিউ কোৰ্টে কংগ্ৰেছৰ প্ৰাক্তন সাংসদ সজ্জন কুমাৰক দোষী সাব্যস্ত কৰিছে। প্ৰাক্তন সাংসদগৰাকীক কি শাস্তি প্ৰদান কৰা হ’ব সেই সন্দৰ্ভত অহা ১৮ ফেব্ৰুৱাৰীত ৰায় ঘোষণা কৰাৰ সম্ভাৱনা আছে।
১৯৮৪ চনৰ ১ নৱেম্বৰত দিল্লীৰ সৰস্বতী বিহাৰত জশৱন্ত সিং আৰু তেওঁৰ পত্নী তৰুণদ্বীপ সিঙৰ হত্যাৰ সৈতে জড়িত গোচৰত অভিযুক্ত আছিল সজ্জন কুমাৰ। বুধবাৰে এই গোচৰতে আদালতে ৰায় প্ৰদান কৰে।
আদালতে ভাৰতীয় দণ্ড বিধি ১৪৭/১৪৮/১৪৯/৩০২/৩০৮/৩২৩/৩৯৫/৩৯৭/৪২৭/৪৩৬/৪৪০ ধাৰাত অপৰাধৰ অভিযোগ উত্থাপন কৰিছিল।
উল্লেখ্য যে এছ আই টিয়ে উত্থাপন কৰা অভিযোগ অনুসৰি সজ্জন কুমাৰৰ নেতৃত্বতে এটা দলে লোক দুজনক জীৱিত অৱস্থাত জ্বলাই দিয়াৰ লগতে ঘৰুৱা সামগ্ৰীৰ লগতে অন্যান্য সা-সম্পত্তিৰো ক্ষতিসাধন কৰে।
হিংস্ৰুক দলটোৱে শিখ সম্প্ৰদায়ৰ পৰিয়ালটোৰ ঘৰত অগ্নিসংযোগ কৰাৰ লগতে পৰিয়ালৰ আন আন সদস্যসকলকো আক্ৰমণ কৰে।
২০২৩ চনৰ ১ নৱেম্বৰত আদালতে এই গোচৰত সজ্জন কুমাৰৰ মন্তব্য লিপিবদ্ধ কৰিছিল আৰু সেই সময়ত সজ্জন কুমাৰে তেওঁৰ বিৰুদ্ধে উত্থাপিত সকলো অভিযোগ অস্বীকাৰ কৰিছিল।
৩১ জানুৱাৰীত শুনানিৰ সময়ত সজ্জন কুমাৰৰ অধিবক্তাই যুক্তি দিছিল যে তেওঁৰ নাম আৰম্ভণিৰে পৰা নাছিল। সাক্ষীগৰাকীয়ে ১৬ বছৰৰ পাছত সজ্জন কুমাৰৰ নাম লয়।
উল্লেখ্য যে, বৰ্তমান দিল্লী কেণ্টৰ আন এক শিখ বিৰোধী সংঘৰ্ষৰ গোচৰত যাৱজ্জীৱন কাৰাদণ্ড ভুগি আছে সজ্জন কুমাৰ।
