মাৰ্চৰ পৰা আৰম্ভ হ’ব পবিত্ৰ ৰমজান মাহ। ইয়াকে লৈ সমগ্ৰ বিশ্বৰ ইছলাম ধৰ্মাৱলম্বী লোকে প্ৰস্তুতি আৰম্ভ কৰিছে। ছৌদি আৰৱক ইছলামৰ কেন্দ্ৰ হিচাপে গণ্য কৰা হয়। প্ৰত্যেক বছৰে চৰকাৰে ৰমজান উপলক্ষে বহু দেশক জাকাত (দাতব্য) দিয়ে, ইয়াৰ লগতে সমগ্ৰ বিশ্বতে ছৌদি আৰৱৰ পৰা উপহাৰও প্ৰেৰণ কৰা হয়।
প্ৰতি বছৰৰ পৰম্পৰা অব্যাহত ৰাখি এইবাৰো ছৌদি ৰজা ছলমানে আগন্তুক ৰমজানত ১০২খন দেশত খেজুৰ বিতৰণৰ কাৰ্যসূচীত অনুমোদন জনাইছে। এইবাৰ বিগত বৰ্ষৰ তুলনাত প্ৰায় ৭০০ টন খেজুৰ আন দেশলৈ প্ৰেৰণ কৰা হ’ব। এই কাৰ্যসূচী ছৌদি আৰৱৰ ইছলামিক পৰিক্ৰমা মন্ত্ৰালয়ৰ তত্বাৱধানত আছে।
ৰজা ছলমানৰ হৈ ছৌদি আৰৱৰ ইছলামিক পৰিক্ৰমা মন্ত্ৰীগৰাকীয়ে বিশেষকৈ ৰমজানৰ সময়ছোৱাত সমগ্ৰ বিশ্বৰ মুছলমানসকলক অবিৰত সহায় আগবঢ়োৱাৰ বাবে কৃতজ্ঞতা প্ৰকাশ কৰে। তেওঁ ইছলামিক মূল্যবোধৰ প্ৰসাৰ, ঘৃণা আৰু উগ্ৰবাদৰ বিৰুদ্ধে যুঁজ দিয়াৰ বাবে দেশখনৰ প্ৰতিশ্ৰুতিৰ ওপৰতো গুৰুত্ব আৰোপ কৰে।
মন্ত্ৰালয়ে খেজুৰ চালানৰ বাবে সকলো লজিষ্টিক প্ৰস্তুতি চূড়ান্ত কৰিছে আৰু ইয়াক ধৰ্মীয় বাৰ্তাৰে ছৌদি দূতাবাস, ইছলামিক কেন্দ্ৰ আৰু বিশ্বৰ সংগঠনসমূহলৈ প্ৰেৰণ কৰা হৈছে।
উল্লেখ্য যে, খেজুৰ স্বাস্থ্যৰ বাবে বহুতো উপকাৰী হোৱাৰ লগতে ইছলাম ধৰ্মত ইয়াৰ বিশেষ গুৰুত্ব আছে। ৰমজানত ৰোজাৰ সময়ত মুছলমানসকলে খেজুৰেৰে ইফতাৰ ভাঙে আৰু ইয়াক চুন্নাহ বুলি কোৱা হয়।
উপসাগৰীয় দেশসমূহত বৃহৎ পৰিমাণে খেজুৰ উৎপাদন কৰা হয়। ইজিপ্ত বিশ্বৰ সৰ্বাধিক খেজুৰ উৎপাদনকাৰী দেশ, তাৰ পিছতে আছে ছৌদি আৰব, আলজেৰিয়া, ইৰাণ আৰু সংযুক্ত আৰব আমিৰশ্বাহী। ছৌদি আৰৱৰ মদিনা অঞ্চলৰ পৰা অহা আজৱা খেজুৰক সৰ্বোত্তম খেজুৰ বুলি গণ্য কৰা হয় আৰু ভাৰতীয় বজাৰত ইয়াৰ মূল্য প্ৰতি কেজিত ২ হাজাৰ টকা পৰ্যন্ত।
