বিশ্বৰ ক্ৰিকেট ইতিহাসত নিজৰ নাম সন্নিবিষ্ট কৰিবলৈ সক্ষম হোৱা যুৱৰাজ সিঙক বাৰু কোনে চিনি নাপায়? নিজৰ দুৰ্দান্ত প্ৰদৰ্শনেৰে ভাৰতীয় দলটোৰ বাবে তেওঁ আগবঢ়োৱা বৰঙণি বাৰু কোনে পাহৰিব পাৰিব?
কিন্তু এই সফল যাত্ৰাৰ সময়ত ভাৰতীয় ক্ৰিকেটাৰ গৰাকীয়ে বহু সংগ্ৰামৰ সন্মুখীন হ’বলগীয়া হৈছিল। নিজৰ জীৱনকো কেৰেপ নকৰি, তেওঁ দেশৰ হকে খেলি গৈছিল এখনৰ পিছত আনখনকৈ এদিনীয়া বিশ্বকাপৰ খেল।
অকল ইমানেই নহয়, তেওঁৰ ক্ৰিকেট কেৰিয়াৰতো সংঘটিত হৈছিল আনে নজনা বহু ঘটনা। কিন্তু ইমানৰ মাজতো নিজ প্ৰদৰ্শনেৰে দলটোৰ হকে সদায় নিৰ্ণায়ক ভূমিকা গ্ৰহণ কৰিব পাৰিছিল কিংবদন্তি ক্ৰিকেটাৰ গৰাকীয়ে।
টিম ইণ্ডিয়াক ২টাকৈ বিশ্বকাপ উপহাৰ দিয়াৰ সমান্তৰালকৈ টি-২০ ক্ৰিকেটত ৬টা বলত ৬টা ছয়েৰে কৃতিত্ব অৰ্জন কৰা বিশ্বৰ শীৰ্ষ খেলুৱৈ সকলৰ ভিতৰত অন্যতম আছিল যুৱৰাজ সিং।
এনে এজন খেলুৱৈৰ সফল যাত্ৰাৰ কিছু তথ্য উপস্থাপনৰ বাবে শেহতীয়াকৈ বলিউডৰ এটা অগ্ৰণি সংস্থাই এক পদক্ষেপ লৈছে। টি ছিৰিজৰ স্বত্বাধিকাৰী ভূষণ কুমাৰে ঘোষণা কৰে যে, অতি শীঘ্ৰে যুৱৰাজ সিঙৰ বায়’পিক নিৰ্মাণ হ’ব আৰু ই কেৱল সমগ্ৰ দেশতেই নহয়, বিশ্বত আলোড়নৰ সৃষ্টি কৰিব।
ইয়াৰ পূৰ্বে যুৱৰাজৰ বন্ধু তথা টিম ইণ্ডিয়াৰ প্ৰাক্তন অধিনায়ক মহেন্দ্ৰ সিং ধোনীৰ ওপৰতো এখন ছবি নিৰ্মাণ কৰা হৈছিল, যিখন ছবি ছুপাৰহিট বুলি প্ৰমাণিত হৈছিল।
যুৱৰাজৰ জীৱন আৰু কেৰিয়াৰ, ছবিৰ চিত্ৰনাট্যতকৈ কম নহয়। তেওঁৰ জীৱনত একচন, নাটক, ট্ৰেজেডী, সকলো আছে। যুৱৰাজ সিঙে কেতিয়াও ক্ৰিকেটাৰ হ’ব বিচৰা নাছিল যদিও পিতৃৰ তাগিদাত তেওঁ ক্ৰিকেটাৰ হ’বলৈ বাধ্য হৈছিল।
প্ৰাৰম্ভিক পৰ্যায়ত যুৱৰাজক প্ৰশিক্ষণৰ বাবে প্ৰাক্তন ক্ৰিকেটাৰ নৱজিৎ সিং সিদ্ধুৰ ওচৰলৈ পঠিওৱা হৈছিল যদিও তেওঁ যুৱৰাজৰ পিতৃক কয় যে, তেওঁৰ পুত্ৰ কেতিয়াও ক্ৰিকেটাৰ হ’ব নোৱাৰে।
ইয়াৰ পিছত যুৱৰাজৰ পিতৃয়ে নিজেই যুৱৰাজক প্ৰশিক্ষণ দি চেম্পিয়ন ক্ৰিকেটাৰৰূপে গঢ়ি তুলিছিল। ২০১১ চনৰ বিশ্বকাপৰ সময়ত যুৱৰাজ সিং কৰ্কট ৰোগত আক্ৰান্ত হৈছিল যদিও ইয়াৰ পিছতো এইগৰাকী খেলুৱৈয়ে সমগ্ৰ প্ৰতিযোগিতাখন খেলাই নহয়, টিম ইণ্ডিয়াক বিশ্ব চেম্পিয়ন কৰাৰ লগতে প্ৰতিযোগিতাখনৰ শ্ৰেষ্ঠ খেলুৱৈৰ বঁটাও লাভ কৰিছিল।
তেওঁৰ জীৱনৰ ওপৰত নিৰ্মাণ হ’বলগীয়া এই ছবিখনত আৰু বহুতো আমোদজনক তথ্যৰ আভাস পাব তেওঁৰ অনুৰাগী তথা দৰ্শকে।
