২০২৫ বৰ্ষত পাকিস্তানত অনুষ্ঠিত হ’বলগীয়া আইচিচি চেম্পিয়নছ ট্ৰফীত অংশগ্ৰহণ নকৰে ভাৰতে। বিচিচিআইৰ এক সূত্ৰত প্ৰকাশ পাইছে এই তথ্য।
নিৰাপত্তাজনিত কাৰণত পাকিস্তানত খেলাৰ পৰা বিৰত থাকিব ভাৰতীয় দলটো। পাকিস্তান ক্ৰিকেট বোৰ্ডে কৰা ঘোষণা অনুসৰি ২০২৫ চনৰ আৰম্ভণিতে লাহোৰত অনুষ্ঠিত হ’ব চেম্পিয়নছ ট্ৰফী।
ভাৰত আৰু পাকিস্তানকে ধৰি ৮টা দলে চেম্পিয়নছ ট্ৰফী ২০২৫ ত অংশগ্ৰহণ কৰিব। এই ৮ টা দলৰ মাজত অনুষ্ঠিত হ’ব মুঠ ১৫ খন খেল।
পিচিবিয়ে আইচিচিক দাখিল কৰা অনুসূচী অনুসৰি, নিৰাপত্তা আৰু ‘লজিষ্টিক’ কাৰণত ভাৰতৰ মেচবোৰ লাহোৰত অনুষ্ঠিত কৰা হ’ব।
ইফালে, বিচিচিআইৰ সূত্ৰ অনুসৰি, হাইব্ৰিড মডেলৰ অধীনত খেলসমূহ শ্ৰীলংকালৈ স্থানান্তৰ কৰিবলৈ পৰামৰ্শ আগবঢ়াব।
উল্লেখ্য যে, পাকিস্তানে বিগত বছৰত এছিয়া কাপ হাইব্ৰিড মডেলত আয়োজন কৰিছিল। ইয়াৰ অধীনত ভাৰতৰ বাহিৰে সকলো দল পাকিস্তানত খেলিছিল। ভাৰতে নিৰাপত্তাৰ কথা উল্লেখ কৰি পাকিস্তান ভ্ৰমণ কৰিবলৈ অস্বীকাৰ কৰিছিল। যাৰবাবে ভাৰতৰ সকলোবোৰ মেচ শ্ৰীলংকাত অনুষ্ঠিত হৈছিল।
