এখনৰ পিছত আন এখন বৈঠকত মিলিত হৈছে ভাৰত আৰু চীন। প্ৰধানমন্ত্ৰী মোদী, বিদেশ মন্ত্ৰী এছ জয়শংকৰৰ পিছত এইবাৰ চীনৰ সৈতে বৈঠকত মিলিত হ’ল ভাৰতৰ প্ৰতিৰক্ষা মন্ত্ৰী ৰাজনাথ সিং।
প্ৰতিৰক্ষা মন্ত্ৰী এডমিৰেল ডং জুন আৰু প্ৰতিৰক্ষা মন্ত্ৰী ৰাজনাথ সিঙৰ মাজত এই বৈঠক লাওছৰ ভিয়েন্টিয়ানত অনুষ্ঠিত একাদশ আছিয়ান প্ৰতিৰক্ষা মন্ত্ৰীসকলৰ বৈঠক-প্লাছ (এডিএমএম-প্লাছ)ৰ সময়ত হৈছিল।
শেহতীয়াকৈ দুয়োখন দেশৰ মাজত সামৰিক প্ৰত্যাহাৰ আৰু লাডাখ অঞ্চলত উত্তেজনা হ্ৰাস কৰাৰ চুক্তিৰ পিছত প্ৰথমবাৰৰ বাবে দুয়োখন দেশৰ প্ৰতিৰক্ষা মন্ত্ৰীৰ মাজত এই বৈঠক অনুষ্ঠিত হয়। এই বৈঠকত সীমান্তত শান্তি আৰু স্থিতিশীলতা বজাই ৰখাকে ধৰি আন বহু বিষয় সন্দৰ্ভত আলোচনা কৰা হয়।
বৈঠকত প্ৰতিৰক্ষা মন্ত্ৰী ৰাজনাথ সিঙে গুৰুত্ব আৰোপ কৰে যে ভাৰত আৰু চীনৰ দৰে বিশাল দেশৰ মাজত শান্তিপূৰ্ণ সম্পৰ্ক কেৱল এছিয়াৰ বাবেই নহয়, বিশ্ব শান্তি আৰু সমৃদ্ধিৰ বাবেও গুৰুত্বপূৰ্ণ। লগতে তেওঁ কয়, ‘আমি সংঘাত নহয়, সহযোগিতাৰ ওপৰত গুৰুত্ব দিয়া উচিত।’
ইফালে ২০২০ চনত সীমান্তত ভাৰত আৰু চীনৰ মাজত ৰক্তাক্ত সংঘৰ্ষ হৈছিল, সেই ঘটনা যাতে ভৱিষ্যতে নহয় তাৰ ওপৰতো দুয়োখন দেশ সহমতত উপনীত হয়।
