বিত্তমন্ত্ৰী নিৰ্মলা সীতাৰমণে ঘোষণা কৰে যে, এতিয়াৰে পৰা দেশত অতি সোনকালে কৰ্কট ৰোগৰ ঔষধৰ মূল্য হ্ৰাস পাব।সোমবাৰে নতুন দিল্লীত জিএছটি পৰিষদৰ ৫৪ সংখ্যক বৈঠকত বিত্তমন্ত্ৰী নিৰ্মলা সীতাৰমনৰ অধ্যক্ষতাত কৰ্কট ৰোগৰ ঔষধৰ ওপৰত জি এছ টিৰ হাৰ হ্ৰাস কৰাৰ সিদ্ধান্ত লোৱা হয়।
ইয়াৰ উপৰিও আন বহু গুৰুত্বপূৰ্ণ বিষয়ৰ ওপৰতো বৈঠকত আলোচনা কৰা হয়।এই বৈঠকত বিত্তমন্ত্ৰী নিৰ্মলা সীতাৰমণে কয় যে, এতিয়াৰে পৰা দেশত কৰ্কট ৰোগৰ ঔষধ মূল্য হ্ৰাস হ’ব।
কৰ্কট ৰোগৰ ঔষধৰ ১২ শতাংশ জিএছটিৰ হাৰ ৫ শতাংশলৈ হ্ৰাস কৰা হৈছে। ইয়াৰ ফলত কেন্সাৰ ঔষধৰ দাম দ্ৰুতগতিত হ্ৰাস পাব বুলি আশা কৰা হৈছে।
জিএছটি কাউন্সিলৰ এই বৈঠকত বিত্তমন্ত্ৰীয়ে কয় যে, প্ৰায়বোৰ ৰাজ্যই স্বাস্থ্য বীমাৰ প্ৰিমিয়ামৰ জিএছটিৰ হাৰ হ্ৰাস কৰিবলৈ সন্মতি প্ৰকাশ কৰিছে। বিহাৰৰ বিত্তমন্ত্ৰী সম্ৰাট চৌধুৰীৰ নেতৃত্বত নতুনকৈ মন্ত্ৰী গোট গঠন কৰা হৈছে। অক্টোবৰ মাহত ইয়াৰ প্ৰতিবেদন দাখিল কৰা হ’ব আৰু তাৰ পিছত নৱেম্বৰ মাহত অনুষ্ঠিত হ’বলগীয়া পৰিষদৰ বৈঠকত ইয়াৰ চূড়ান্ত সিদ্ধান্ত লোৱা হ’ব।
দেশত জিএছটি ব্যৱস্থা ৰূপায়ণৰ সময়তে গঠন কৰা হৈছিল জিএছটি কাউন্সিল। এই পৰিষদৰ অধ্যক্ষতা কৰে দেশৰ বিত্তমন্ত্ৰীয়ে। যিহেতু সকলো ৰাজ্য আৰু কেন্দ্ৰীয় শাসিত অঞ্চলৰ বিত্তমন্ত্ৰী বা তেওঁলোকৰ প্ৰতিনিধিয়েই এই কাউন্সিলৰ সদস্য। গতিকে এই পৰিষদে জিএছটিৰ সৈতে জড়িত সকলোধৰণৰ সিদ্ধান্তই গ্ৰহণ কৰে।
