বিহাৰৰ গয়াজীত হোম গাৰ্ডৰ নিযুক্তি পৰীক্ষাৰ বাবে অহা এগৰাকী মহিলা প্ৰাৰ্থীক ধৰ্ষণ কৰাৰ এক ভয়ংকৰ খবৰ পোহৰলৈ আহিছে। জানিব পৰা মতে, বোধগয়াৰ বিএমপি-৩ৰ খেলপথাৰত মহিলা হোম গাৰ্ড নিযুক্তিৰ বাবে শাৰিৰীক পৰীক্ষা চলি থকাৰ সময়তে মহিলা প্ৰাৰ্থীগৰাকী হঠাতে অজ্ঞান হৈ মাটিত পৰি যায়। লগে লগে তাত উপস্থিত থকা বিভাগীয় লোকসকলে এম্বুলেন্সৰ সহায়ত মহিলাগৰাকীক চিকিৎসালয়লৈ প্ৰেৰণ কৰে।
হাস্পতাললৈ লৈ যোৱাৰ সময়তে অচেতন অৱস্থাত থকা মহিলা প্ৰাৰ্থীগৰাকীৰ সৈতে এম্বুলেন্স চালক আৰু বাহনখনৰ টেকনিচিয়ানে কু-কাণ্ড সংঘটিত কৰাৰ অভিযোগ উত্থাপন হয়। মহিলাগৰাকীয়ে ঘটনাৰ বিষয়ে চিকিৎসক আৰু আৰক্ষীক জনোৱাত তাৎক্ষণিক ব্যৱস্থা গ্ৰহণ কৰি দুয়োজন অভিযুক্তক গ্ৰেপ্তাৰ কৰে।
সম্প্ৰতি আৰক্ষীৰ জিম্মাত থকা দুয়োজন অভিযুক্তকে মাৰাথন জেৰা চলাই আছে। লগতে ভুক্তভোগীৰ চিকিৎসা পৰীক্ষাও কৰা হৈছে। মহিলাগৰাকীৰ স্বাস্থ্য পৰীক্ষাৰ প্ৰতিবেদন অহাৰ পিছতহে পৰিস্থিতি অধিক স্পষ্ট হৈ পৰিব।
ইয়াৰ লগতে আৰক্ষীয়ে এই বিষয়টো অতি গুৰুতৰ বুলি অভিহিত কৰি তদন্তত কোনো ধৰণৰ গাফিলতি নহ’ব বুলিও স্পষ্ট কৰি দিয়ে। এই ঘটনাৰ লগত আন কোনো ব্যক্তি জড়িত আছিল নে নাই সেয়াও নিশ্চিত কৰা হৈছে।
উল্লেখ্য, হোম গাৰ্ড নিযুক্তিৰ পৰীক্ষাৰ বাবে অহা মহিলা প্ৰাৰ্থীগৰাকী গয়াজী জিলাৰ ইমামগঞ্জ থানা এলেকাৰ বাসিন্দা বুলি কোৱা হৈছে। এম্বুলেন্স চালক বিনয় কুমাৰ আৰু টেকনিচিয়ান অজিত কুমাৰক গ্ৰেপ্তাৰ কৰা হৈছে।
ঘটনাস্থলীৰ পৰা চিচিটিভিৰ ফুটেজকে ধৰি বহু প্ৰমাণ সংগ্ৰহ কৰিছে আৰক্ষীয়ে। বিষয়টো পোহৰলৈ অহাৰ পিছতে নিৰাপত্তাৰ ব্যৱস্থাক লৈ প্ৰশ্ন উত্থাপন কৰিছে আন মহিলা প্ৰাৰ্থীয়ে।
