অতি শীঘ্ৰে গাজাত দীৰ্ঘদিনীয়া যুদ্ধৰ অন্ত পৰাৰ সম্ভাৱনা আছে। ইয়াৰ বাবে আমেৰিকাৰ ৰাষ্ট্ৰপতি ড’নাল্ড ট্ৰাম্পে প্ৰস্তুত কৰিছে এক বিশেষ পৰিকল্পনা।
৩০ ছেপ্টেম্বৰত প্ৰধানমন্ত্ৰী নৰেন্দ্ৰ মোদীয়ে ট্ৰাম্পৰ এই পৰিকল্পনাক আদৰণি জনায়। তেওঁ এই কথাত সন্মতি প্ৰকাশ কৰে আৰু লগতে কয় যে, এই বিষয়ত আন দেশসমূহেও ট্ৰাম্পৰ সৈতে একমত হ’ব, যিয়ে হামাছ আৰু ইজৰাইলৰ মাজত চলি থকা যুদ্ধৰ অন্ত পেলোৱাত সহায় কৰিব।
প্ৰধানমন্ত্ৰী মোদীয়ে এক্স-পোষ্টৰ জৰিয়তে কয় যে, গাজা সংঘাতৰ অন্ত পেলোৱাৰ বাবে ৰাষ্ট্ৰপতি ড’নাল্ড ট্ৰাম্পৰ পৰিকল্পনাক তেওঁ আদৰণি জনাইছে। এই পৰিকল্পনাই পেলেষ্টাইন আৰু ইজৰাইলৰ জনসাধাৰণৰ লগতে সমগ্ৰ পশ্চিম এছিয়া অঞ্চলৰ বাবে দীৰ্ঘম্যাদী শান্তি, নিৰাপত্তা আৰু উন্নয়নৰ বাবে এক ভাল পথ প্ৰশস্ত কৰিব। লগতে সংশ্লিষ্ট সকলো পক্ষই ট্ৰাম্পৰ এই পদক্ষেপক সমৰ্থন কৰিব বুলি তেওঁ আশাবাদী।
উল্লেখ্য যে, মাৰ্কিন ৰাষ্ট্ৰপতি ট্ৰাম্পে গাজাৰ সংঘাতৰ অন্ত পেলাবলৈ ২০ দফীয়া পৰিকল্পনা প্ৰস্তুত কৰিছে। এই পৰিকল্পনাই ইজৰাইলৰ প্ৰধানমন্ত্ৰী বেঞ্জামিন নেতানিয়াহু আৰু মুছলমান দেশৰ সমৰ্থন লাভ কৰিছে। ইজিপ্ত আৰু কাটাৰে এতিয়া আমেৰিকাৰ ৰাষ্ট্ৰপতিৰ এই প্ৰস্তাৱ হামাছৰ সন্মুখত দাখিল কৰিছে। হামাছে কয় যে, কোনো সঁহাৰি জনোৱাৰ পূৰ্বে এই বিষয়টো গুৰুত্বসহকাৰে বিবেচনা কৰা হ’ব।
