টেষ্টৰ শেহতীয়া বেটিং ৰেংকিং ঘোষণা কৰিছে আই চি চিয়ে। নাম্বাৰ ৱানৰ ৰাজত্ব শেষ জো ৰুটৰ। জো ৰুটক আঁতৰাই টেষ্ট ৰেংকিঙৰ প্ৰথম স্থানত অধিষ্ঠিত হৈছে তেওঁৰেই সতীৰ্থ হেৰী ব্ৰুক। ভাৰতৰ বিৰুদ্ধে চলি থকা টেষ্ট শৃংখলাৰ প্ৰথম দুখন মেচত আশানুৰূপ প্ৰদৰ্শনত ব্যৰ্থ হোৱা ৰুট ৰেংকিঙৰ দ্বিতীয় স্থানলৈ অৱনমিত হৈছে।
আই চি চিৰ বেটিং টেষ্ট ৰেংকিঙত কেন উইলিয়ামছন তৃতীয় স্থানত থকাৰ বিপৰীতে ভাৰতৰ যশস্বী জয়ছৱাল চতুৰ্থ স্থানত আছে। ৰেংকিঙৰ পঞ্চম স্থানত আছে অষ্ট্ৰেলিয়াৰ ষ্টিভ স্মিথ।
আইচিচিৰ শেহতীয়া বেটিং টেষ্ট ৰেংকিঙত আটাইতকৈ ডাঙৰ লাভ হৈছে শুভমন গিলৰ। ১৫টা স্থান আগুৱাই তেওঁ উপনীত হৈছে ষষ্ঠ স্থানত। উল্লেখ্য যে এজবাষ্টন টেষ্টত গিলে চমকপ্ৰদ প্ৰদৰ্শন আগবঢ়াই প্ৰথম ইনিংছত দ্বিশতক আৰু দ্বিতীয় ইনিংছত শতকীয় ইনিংছেৰে সৰ্বমুঠ ৪৩০ ৰান সংগ্ৰহ কৰিছিল।
ইয়াৰ পিছত দক্ষিণ আফ্ৰিকাৰ অধিনায়ক টেম্বা বাভুমা ৭ নম্বৰত আছে। একে সময়তে এটা স্থান অৱনমিত হৈছে ভাৰতৰ ঋষভ পন্তৰ। পন্ত এতিয়া ৰেংকিঙৰ অষ্টম স্থানত আছে।
আই চি চিয়ে শেহতীয়াকৈ প্ৰকাশ কৰা ৰেংকিঙত শ্ৰীলংকাৰ কামিন্দু মেণ্ডিছ ৯ নম্বৰত আৰু ইংলেণ্ডৰ উইকেটকীপাৰ জেমী স্মিথ ১০ নম্বৰত আছে।
