কেন্দ্ৰীয় চৰকাৰে ভাৰতীয় নাগৰিকত্ব লাভৰ প্ৰক্ৰিয়াত এক বৃহৎ পৰিৱৰ্তন আনিছে। গৃহ পৰিক্ৰমা মন্ত্ৰালয়ে নাগৰিকত্ব বিধি সংশোধন কৰি নতুন খচৰা অধিসূচনা জাৰি কৰিছে। নতুন নিয়মৰ অধীনত এতিয়া কিছুমান বিদেশী আবেদনকাৰীয়ে ভাৰতীয় নাগৰিকত্ব লাভ কৰাৰ পূৰ্বে পাকিস্তান, আফগানিস্তান, বাংলাদেশৰ পৰা পাছপ’ৰ্টৰ সন্দৰ্ভত সম্পূৰ্ণ তথ্য দিব লাগিব। তদুপৰি নাগৰিকত্ব প্ৰদানৰ পিছত এনে পাছপ’ৰ্ট জমা দিয়াটো বাধ্যতামূলক হ’ব।
গৃহ মন্ত্ৰালয়ে জাৰি কৰা খচৰা অনুসৰি, নাগৰিকত্ব আইন ১৯৫৫ৰ অধীনত ২০০৯ চনৰ নিয়মাৱলী সংশোধন কৰা হৈছে। তফছিল আই চিত এটা নতুন অনুচ্ছেদ (iiiA) সংযোজন কৰা হৈছে।
নতুন নিয়ম অনুসৰি নাগৰিকত্বৰ বাবে আবেদনকাৰীয়ে পাকিস্তান, আফগানিস্তান, বা বাংলাদেশৰ বৈধ বা ম্যাদ উকলি যোৱা পাছপ’ৰ্ট আছে নে নাই সেই কথা উল্লেখ কৰিব লাগিব। যদি তেওঁলোকৰ হাতত এই কোনো এখন দেশৰ পাছপ’ৰ্ট আছে তেন্তে তেওঁলোকে সম্পূৰ্ণ তথ্য দিব লাগিব।
চৰকাৰে স্পষ্ট কৰি দিছে যে ভাৰতীয় নাগৰিকত্ব লাভ কৰাৰ ১৫ দিনৰ ভিতৰত বিদেশী পাছপ’ৰ্ট সংশ্লিষ্ট কৰ্তৃপক্ষক জমা দিব লাগিব। ইয়াৰ বাবে আবেদনকাৰীয়ে লিখিত সন্মতিও দিব লাগিব।
অধিসূচনা অনুসৰি পাছপ’ৰ্ট সংশ্লিষ্ট জ্যেষ্ঠ ডাক অধীক্ষক বা ডাক অধীক্ষকৰ হাতত জমা দিব লাগিব। এই নতুন নিয়ম অফিচিয়েল গেজেটত প্ৰকাশ পোৱাৰ লগে লগে কাৰ্যকৰী হ’ব।
এই মাহত কেন্দ্রীয় চৰকাৰে নাগৰিকত্ব নিয়মৰ আন আন উল্লেখযোগ্য সালসলনিও কৰিলে৷ চৰকাৰে প্ৰৱৰ্তন কৰিলে ইলেক্ট্ৰনিক অভাৰচিজ চিটিজেন অৱ ইণ্ডিয়া (ই-অ’চিআই) কাৰ্ড। আবেদন প্ৰক্ৰিয়া সম্পূৰ্ণ অনলাইনত কৰা হৈছে। নাবালকৰ দ্বৈত পাছপ’ৰ্ট সন্দৰ্ভতো নিয়ম কটকটীয়া কৰিছে চৰকাৰে। তদুপৰি ভৌতিক নথি-পত্ৰৰ পৰিৱৰ্তে ডিজিটেল চিনাক্তকৰণৰ প্ৰচাৰ কৰা হৈছে, যাৰ ফলত প্ৰবাসী ভাৰতীয়সকলৰ বাবে প্ৰক্ৰিয়াটো সহজ হৈ পৰিছে।
নতুন বিধানৰ অধীনত আবেদনকাৰীয়ে তেওঁলোকৰ বায়’মেট্ৰিক তথ্য শ্বেয়াৰ কৰিবলৈও সন্মতি দিব লাগিব। চৰকাৰে কয় যে ইয়াৰ দ্বাৰা দ্ৰুতগতিত প্ৰব্ৰজন প্ৰক্ৰিয়া ৰূপায়ণ কৰাত সহায়ক হ’ব আৰু ভৱিষ্যতে স্বয়ংক্ৰিয় নামভৰ্তিৰ দৰে বৈশিষ্ট্যৰ সুবিধা হ’ব।
