নাম সলনি কৰা হ’ল কৰিমগঞ্জ জিলাৰ। এতিয়াৰে পৰা কৰিমগঞ্জ জিলাক শ্ৰীভূমি জিলা হিচাপে জনা যাব। ৰাজ্যিক কেবিনেট বৈঠকৰ অন্তত সংবাদমেলযোগে এই ডাঙৰ ঘোষণা কৰে মুখ্যমন্ত্ৰী ড০ হিমন্ত বিশ্ব শৰ্মাই।
সংবাদমেল সম্বোধন কৰি মুখ্যমন্ত্ৰী শৰ্মাই কয় যে অসমৰ নগৰ জিলা সমূহৰ কিছু নাম বেলেগ হৈ আছে। অসমৰ সংস্কৃতিৰ লগত নিমিলা নামবোৰ আমি সলাইছিলো। কৰিমগঞ্জ জিলা এতিয়াৰ পৰা শ্ৰীভূমি নামে নামাকৰণ কৰা হ’ল।
ইতিমধ্যেই কৰিমগঞ্জ জিলাৰ নামটো শ্ৰীভূমি কৰাৰ বাবে প্ৰস্তাৱ আগবঢ়োৱা হৈছিল আৰু সেই প্ৰস্তাৱক আজি অনুমোদন জনাই ৰাজ্যিক কেবিনেটে।
সংবাদমেলত ডাঙৰ ঘোষণা কৰি মুখ্যমন্ত্ৰী শৰ্মাই কয় যে, যিবিলাক নামে ইতিহাসক প্ৰতিনিধিত্ব নকৰে সেইবোৰ নাম আমি লাহে লাহে সলনি কৰি আছো। অসমৰ বহু গাঁৱৰ নাম আমি সলনি কৰিছো’।
ইফালে কেবিনেট বৈঠকতে পঞ্চায়ত নিৰ্বাচন সন্দৰ্ভতো ডাঙৰ সিদ্ধান্ত গ্ৰহণ কৰা হয়। তেওঁ কয়, ‘অহা ১০ ফেব্ৰুৱাৰীৰ পূৰ্বে অনুষ্ঠিত হ’ব পঞ্চায়ত নিৰ্বাচন। দুটা পৰ্যায়ত অনুষ্ঠিত হ’ব পঞ্চায়ত নিৰ্বাচন। ইয়াৰ বাবে ৩০ ডিচেম্বৰত প্ৰকাশ পাব ভোটাৰ তালিকা’।
