সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
৫ জুনত ড০ হিমন্ত বিশ্ব শৰ্মা মন্ত্ৰীসভাৰ সম্প্ৰসাৰণ। মন্ত্ৰীসভাত কোন কোন বিধায়কে স্থান লাভ কৰিব ইয়াকে লৈ ব্যাপক জল্পনা-কল্পনাৰ সৃষ্টি। ইতিমধ্যে চূড়ান্ত হৈছে মন্ত্ৰীসভাৰ তালিকা। আজি সন্ধিয়া মুখ্যমন্ত্ৰীয়ে মন্ত্ৰীসভাৰ তালিকা ঘোষণা কৰাৰ সম্ভাৱনা। মন্ত্ৰীসভাত নতুন মুখে স্থান পাব নে নাই তাক লৈও চৰ্চা। কাইলৈ খানাপাৰাৰ জ্যোতি-বিষ্ণু আন্তৰ্জাতিক কলা মন্দিৰত অনুষ্ঠিত হ’ব শপতগ্ৰহণ অনুষ্ঠান। মন্ত্ৰীসভাৰ শপতগ্ৰহণ অনুষ্ঠান পৰিচালনাৰ বাবে ৮গৰাকী ACS বিষয়াক দায়িত্ব।
৩০ শতাংশ কৰ্তন কৰা হ’ব চৰকাৰী কৰ্মচাৰীৰ দৰমহা। অহা ছমাহলৈ ৩০ শতাংশ দৰমহা কৰ্তন কৰাৰ নিৰ্দেশ। মধ্য প্ৰাচ্যত চলা যুদ্ধৰ ফলত দেখা দিয়া অভাৱনীয় পৰিস্থিতিৰ প্ৰতি লক্ষ্য ৰাখি এই সিদ্ধান্ত গ্ৰহণ কৰা হৈছে। চৰকাৰী কৰ্মচাৰীৰ দৰমহা কৰ্তনৰ সিদ্ধান্ত গ্ৰহণ কৰিলে BTC চৰকাৰে। BTCৰ সকলো কাৰ্যবাহী সদস্য তথা পাৰিষদসকলৰ দৰমহা ৩০ শতাংশ কৰ্তন কৰা হ’ব। BTCৰ সচিবালয়ত হাগ্ৰামা মহিলাৰীৰ নেতৃত্বত অনুষ্ঠিত বৈঠকত গুৰুত্বপূৰ্ণ সিদ্ধান্ত।
বিহাৰৰ মুজাফ্ফৰপুৰত এক বৃহৎ অগ্নিকাণ্ড সংঘটিত হোৱাৰ খবৰ পোৱা গৈছে। ৪ জুনৰ পুৱা প্ৰায় ৩:০০ বজাত মুজাফ্ফৰপুৰৰ সৰ্ববৃহৎ চিকিৎসালয় প্ৰসাদ হাস্পতালৰ ICU ত ব্যাপক অগ্নিকাণ্ড সংঘটিত হয়। অগ্নিকাণ্ডৰ পিছত ধোঁৱাই আৱৰি ধৰে চিকিৎসালয়খন। ইতিমধ্যে ১৫ জন লোকক উদ্ধাৰ কৰা হৈছে যদিও ইয়াৰে ৩জনৰ মৃত্যু নিশ্চিত কৰা হৈছে। বাকী ১২ গৰাকীক চিকিৎসাৰ বাবে আন এখন চিকিৎসালয়ত ভৰ্তি কৰোৱা হৈছে।
ইৰাণ যুদ্ধক লৈ এক বৃহৎ বিপৰ্যয়ৰ সন্মুখীন হৈছে আমেৰিকাৰ ৰাষ্ট্ৰপতি ড’নাল্ড ট্ৰাম্প। ইৰাণৰ বিৰুদ্ধে আমেৰিকাৰ সামৰিক ব্যৱস্থা সীমিত কৰাৰ লক্ষ্যৰে আমেৰিকাৰ কংগ্ৰেছে ৱাৰ পাৱাৰছ ৰিজ’লিউচন গৃহীত কৰিছে। এই পদক্ষেপক ৰাষ্ট্ৰপতি ড’নাল্ড ট্ৰাম্পৰ বাবে ৰাজনৈতিক প্ৰত্যাহ্বান হিচাপে দেখা গৈছে, কিয়নো ৰিপাব্লিকান দলৰ কিছুমান সাংসদে ডেম’ক্ৰেটসকলৰ সৈতে যোগ দি ইয়াক সমৰ্থন কৰিছে।
