মাৰ্চ মাহৰ ২২ তাৰিখৰ পৰা অনুষ্ঠিত হ’ব আই পি এল ২০২৫। প্ৰায় দুমাহ ধৰি অনুষ্ঠিত হ’ব লগা প্ৰতিযোগিতাখনত অনুষ্ঠিত হ’ব সৰ্বমুঠ ৭০খন মেচ। কলকাতৰ ইডেন গাৰ্ডেনত অনুষ্ঠিত হ’ব ১৮ সংখ্যক আই পি এলৰ উদ্বোধনী মেচ। ডিফেণ্ডিং চেম্পিয়ন কলকাতা নাইট ৰাইডাৰ্ছ আৰু ৰয়েল চেলেঞ্জাৰ্ছ বাংগালুৰুৰ মাজত হ’ব প্ৰথমখন মেচ।
ইফালে, বিগত বৰ্ষৰ দৰে এইবাৰো এই প্ৰতিযোগিতাখনৰ দুখনকৈ গুৰুত্বপূৰ্ণ মেচ অনুষ্ঠিত হ’ব গুৱাহাটীত। গুৱাহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত হ’বলগীয়া মেচ দুখনৰ প্ৰথমখন মেচৰ টিকট আজিৰ পৰা উপলব্ধ হ’ব।
আজি বিয়লি ৪ বজাৰ পৰা বুক মাই শ্ব’ত উপলব্ধ হ’ব টিকট। ২৬ মাৰ্চত হ’বলগীয়া মেচখনৰ বাবে আজিৰ পৰা টিকট উপলব্ধ হ’ব বুলি জানিব পৰা গৈছে। এই মেচখনত ঘৰুৱা দল ৰাজস্থান ৰয়েলছৰ বিৰুদ্ধে অৱতীৰ্ণ হ’ব কলকাতা নাইট ৰাইৰ্ডাছ।
আজি গুৱাহাটীত ৰাজস্থান ৰয়েলছৰ চি ই অ’ জেক লাছ মেক্ৰামে সম্বোধন কৰা সংবাদমেলৰ জৰিয়তে প্ৰথমখন মেচৰ টিকট আজি বিয়লি ৪ বজাৰ পৰা মুকলি কৰা হ’ব বুলি জানিবলৈ দিয়ে।
ৰাজস্থান ৰয়েলছৰ দ্বিতীয় হোম গ্ৰাউণ্ড হিচাপে পৰিচিত গুৱাহাটীত দ্বিতীয়খন মেচ হ’ব ৩০ মাৰ্চত। এই মেচখনত ৰাজস্থান ৰয়েলছৰ মুখামুখি হ’ব চেন্নাই ছুপাৰ কিংছ।
ইফালে সংবাদমেলৰ পূৰ্বে অনুষ্ঠিত হয় ৰাজস্থান ৰয়েলছৰ জাৰ্চি মুকলি অনুষ্ঠান। অসম ক্ৰিকেট সন্থাৰ সভাপতি তথা বিধায়ক তৰংগ গগৈ আৰু ৰাজস্থান ৰয়েলছৰ মুখ্য প্ৰশিক্ষক ৰাহুল দ্ৰাবিড়ে মুকলি কৰে দলটোৰ নতুন জাৰ্চি।
ইনপুট : তুষা ৰঞ্জন বৰা
