এগৰাকী নেতাৰ বিতৰ্কিত ভাষণৰ প্ৰভাৱ এতিয়া দেখা গৈছে এতিয়া সমগ্ৰ দেশত। ইয়াৰ পূৰ্বে দণ্ডিয়া গৰ্বা মহোৎসৱ, মহা কুম্ভকে ধৰি বহু হিন্দু উৎসৱত মুছলমানৰ প্ৰৱেশ নিষিদ্ধ কৰাৰ দাবী উত্থাপন হৈছিল। এতিয়া হোলী উদযাপনতো মুছলমানৰ প্ৰৱেশ নিষিদ্ধ কৰাৰ দাবী উত্থাপন হৈছে।
দৰাচলতে উত্তৰ প্ৰদেশৰ মথুৰা জিলাত হোলী উদযাপনত মুছলমানৰ প্ৰৱেশ নিষিদ্ধ কৰাৰ দাবী উত্থাপন হৈছে। এই সন্দৰ্ভত দেশত নতুন বিতৰ্কৰ সৃষ্টি হৈছে। মথুৰাৰ সন্তসকলে স্পষ্টকৈ কৈছে যে, হোলীৰ সময়ত মুছলমানক ব্ৰজ অঞ্চলত প্ৰৱেশ কৰিবলৈ দিয়া নহ’ব। এই অঞ্চলত মুছলমানৰ প্ৰৱেশ নিষিদ্ধ কৰা হ’ব।
শ্ৰী কৃষ্ণ জন্মভূমি গোচৰৰ আবেদনকাৰী দীনেশ শৰ্মা ফলাহাৰীয়ে ব্ৰজ হোলীত মুছলমানৰ প্ৰৱেশ সম্পূৰ্ণ নিষিদ্ধ কৰাৰ দাবীত উত্তৰ প্ৰদেশৰ মুখ্যমন্ত্ৰীলৈ তেজেৰে এখন পত্ৰ লিখিছে। দীনেশ শৰ্মা ফলাহাৰীয়ে কয় যে, হিন্দুসকলে উত্তৰ প্ৰদেশৰ মুখ্যমন্ত্ৰীলৈ দাবী জনাই যে, হোলীৰ দৰে পৱিত্ৰ উৎসৱত মুছলমানৰ দোকান স্থাপন কৰিব নোৱাৰিব।
তেওঁ কয় যে, হোলীৰ ৰঙত মুছলমানে বিষ মিহলাই তাত কাঁচৰ টুকুৰা দিব পাৰে, মিঠাইত বিষাক্ত মিশ্ৰণ কৰিব পাৰে। এনে মানুহক আমাৰ এই উৎসৱৰ পৰা আঁতৰাই ৰাখিব লাগে, কাৰণ তেওঁলোকে যিকোনো পৰিসৰলৈ যাব পাৰে। মক্কা-মদিনালৈ যদি হিন্দু যাব নোৱাৰে, তেন্তে হিন্দুৰ উৎসৱত কিয় হস্তক্ষেপ কৰিবলৈ চেষ্টা কৰে বুলি তেওঁ প্ৰশ্ন কৰে।
ইয়াৰ উপৰি মথুৰাৰ সন্তসকলে কয় যে, হোলীৰ দৰে হিন্দু ধৰ্মৰ প্ৰধান উৎসৱটো চাবলৈ দেশৰ বিভিন্ন প্ৰান্তৰ পৰা মানুহ মথুৰালৈ আহে। এনে পৰিস্থিতিত হোলীৰ সময়ত ব্ৰজলৈ মুছলমানসকলৰ আগমন তেওঁলোকৰ বিশ্বাস আৰু ধৰ্মীয় পৰম্পৰাৰ বিৰোধী।
