মানুহে আত্মহত্যা কৰাৰ খবৰ আপুনি বহুত শুনিছে। কিন্তু প্ৰথমবাৰৰ বাবে ৰৱটে আত্মহত্যা কৰাৰ ঘটনা পোহৰলৈ আহিছে। অতিৰিক্ত কামৰ বোজা সহিব নোৱাৰি ৰৱটে আত্মহত্যা কৰাৰ চাঞ্চল্যকৰ ঘটনা পোহৰলৈ আহিছে।
চিনেমা-চিনেমা লগা এই ঘটনা সংঘটিত হৈছে দক্ষিণ কোৰিয়াত। দক্ষিণ কোৰিয়াৰ গুমি নগৰ পৰিষদে ২৬ জুনত প্ৰকাশ কৰিছিল যে তেওঁলোকৰ শীৰ্ষ প্ৰশাসনিক বিষয়া ৰৱটটো মৃত অৱস্থাত পোৱা গৈছিল। পৰিষদে কৈছিল যে, ৰৱটটোৱে ছয় ফুট ওখ চিৰিৰ পৰা জঁপিয়াই আত্মহত্যা কৰিছে।
এটা আগশাৰীৰ সংবাদ মাধ্যমৰ খবৰ অনুসৰি, স্থানীয় লোকসকল এই ঘটনাত হতবাক হৈছে আৰু এই ঘটনাক ৰৱটৰ প্ৰথম আত্মহত্যাৰ ঘটনা বুলি কোৱা হৈছে।
উল্লেখ্য যে, এমআই চিটি কাউন্সিলে ২০২৩ চনৰ আগষ্টত এই ৰৱটটো নিযুক্ত কৰিছিল। ইয়াক কেলিফৰ্ণিয়াস্থিত কোম্পানী বেয়াৰ ৰৱটিক্সে নিৰ্মাণ কৰিছিল। এই ৰৱটটোৱে পুৱা ৯ বজাৰ পৰা সন্ধিয়া ৬ বজালৈ কাম কৰিছিল।
এএফপিৰ মতে, ই এনে ধৰণৰ প্ৰথম ৰৱট আছিল যি চহৰখনৰ দস্তাবেজ বিতৰণ আৰু প্ৰচাৰ আৰু তথ্যত সহায় কৰিছিল। আন ৰৱটৰ বিপৰীতে ই নিজৰ এলিভেটৰ চলাবলৈ আৰু বিভিন্ন মহলালৈ যাবলৈ সক্ষম হৈছিল।
ৰৱটটো আনুষ্ঠানিকভাৱে চিটি হলৰ অংশ আছিল। তেওঁ অতি নিষ্ঠাৰে কাম কৰিছিল কিন্তু হঠাতে চিৰিৰ পৰা জঁপিয়াই আত্মহত্যা কৰাৰ ঘটনাত চিন্তিত হৈছে নিৰ্মাণৰত কোম্পানীটো।
ইফালে, ঘটনাটোৰ প্ৰত্যক্ষদৰ্শীয়ে কৈছিল যে, ‘প্ৰথমে এই ৰৱটটোৱে চিৰিৰ ওপৰত ঘূৰি ফুৰিবলৈ আৰম্ভ কৰিছিল। তাৰ পিছত হঠাতে তেওঁ চিৰিৰ পৰা জঁপিয়াই দিয়ে। এই সমগ্ৰ ঘটনাত গুমি নগৰ পৰিষদে ঘোষণা কৰিছে যে ৰৱটটোৱে কিয় আত্মহত্যাৰ পদক্ষেপ লৈছিল জানিবলৈ চেষ্টা কৰিব। বৰ্তমান ৰৱটৰ টুকুৰাবোৰ সংগ্ৰহ কৰি পৰীক্ষাৰ বাবে ফৰেনচিক লেবলৈ প্ৰেৰণ কৰা হৈছে।
উল্লেখ্য যে, দক্ষিণ কোৰিয়া এনেকুৱা এখন দেশ য’ত প্ৰতি ১০ জন কৰ্মচাৰীৰ বিপৰীতে এজন ৰৱটে কাম কৰে। আনকি, বহুকেইটা চৰকাৰী গুৰুত্বপূৰ্ণ দপ্তৰতো ৰৱটে সেৱা আগবঢ়াইছে।
বিশ্বৰ অন্য দেশৰ তুলনাত দক্ষিণ কোৰিয়াত ৭ গুণ অধিক ৰৱটে সেৱা আগবঢ়াই আহিছে। আনকি, এইক্ষেত্ৰত আমেৰিকাকো চেৰ পেলাইছে কোৰিয়ান দেশখনে।
