ৰাজস্থান ৰয়েলছৰ বিৰুদ্ধে প্ৰথমে বেটিং কৰাৰ পিছত গুজৰাট টাইটানছৰ আৰম্ভণি বেয়া আছিল যদিও তাৰ পিছত ছাই সুদৰ্শন আৰু জোছ বাটলাৰে ইনিংছৰ পৰিস্থিতি সলনি কৰে। বাটলাৰ আৰু ছাই সুদৰ্শনে দ্বিতীয় উইকেটত ৮০ ৰান সংযোজন কৰি গুজৰাটৰ বাবে এটা ডাঙৰ লক্ষ্যৰ ভেটি স্থাপন কৰে।
আৰম্ভণি ভাল হোৱাৰ পিছতো বাটলাৰে নিজৰ ইনিংছ আগবঢ়াই নিবলৈ সক্ষম নহ’লেও ছাই সুদৰ্শনে ক্ৰিজত থাকি ৮২ ৰানৰ দৰ্শনীয় ইনিংছ খেলে। ছাই সুদৰ্শনে নিজৰ ইনিংছত ৫৩টা বলৰ মুখামুখি হৈ ৮টা চাৰি আৰু তিনিটা ছয়েৰে এই ইনিংছটো খেলে।
গুজৰাটে ২০ অভাৰত ৬ উইকেট হেৰুৱাই ২১৭ ৰান সংগ্ৰহ কৰি ৰাজস্থানক ২১৮ ৰানৰ লক্ষ্য বান্ধি দিয়ে। আজিৰ এই ইনিংছটোৰ জৰিয়তে ছাই সুদৰ্শনে নিজৰ নামত এক ডাঙৰ অভিলেখ গঢ়িবলৈ সক্ষম হয়।
কেইবাজনো মহান ক্ৰিকেটাৰৰ অভিলেখ ভংগ কৰিলে ছাই সুদৰ্শনে
আই পি এলৰ প্ৰথম ৩০ ইনিংছৰ পিছত এতিয়া সৰ্বাধিক ৰান সংগ্ৰহকাৰীৰ তালিকাত দ্বিতীয় স্থানত উপনীত হৈছে ছাই সুদৰ্শন। এই সময়ছোৱাত ছাই সুদৰ্শনে ক্ৰীছ গেইল, কেন উইলিয়ামছন আৰু মেথিউ হেডেনৰ অভিলেখ ভংগ কৰিছে। ছাই সুদৰ্শনে ৩০ ইনিংছৰ অন্তত ১৩০৭ ৰান সংগ্ৰহ কৰিছে।
একে সময়তে আই পি এলত প্ৰথম ৩০ ইনিংছৰ পিছত সৰ্বাধিক ৰান সংগ্ৰহৰ অভিলেখ শ্বন মাৰ্ছৰ নামত আছে। শ্বন মাৰ্ছৰ নামত আছে ১৩৩৮ ৰান।
আই পি এলৰ প্ৰথম ৩০টা ইনিংছৰ পিছত সৰ্বাধিক ৰান
১৩৩৮ – শ্বাউন মাৰ্ছ
১৩০৭ – ছাই সুদৰ্শন
১১৪১ – ক্ৰীছ গেইল
১০৯৬ – কেন উইলিয়ামছন
১০৮২ – মেথিউ হেডেন
