অহা মে’ মাহত দুটা পৰ্যায়ত অনুষ্ঠিত হ’বলগীয়া পঞ্চায়ত নিৰ্বাচনৰ বাবে ৰাজ্য চৰকাৰে বন্ধ ঘোষণা ঘোষণা কৰিছে। ২ মে’ত হ’বলগীয়া প্ৰথম পৰ্যায়ৰ ভোটগ্ৰহণৰ বাবে ১৪ খন জিলাত বন্ধ ঘোষণা কৰিছে।
এই ১৪ খন জিলা হৈছে তিনিচুকীয়া, ডিব্ৰুগড়, চৰাইদেউ, শিৱসাগৰ, মাজুলী, যোৰহাট, গোলাঘাট, ধেমাজি, লখিমপুৰ, শোণিতপুৰ, বিশ্বনাথ, কাছাৰ, হালাকান্দি আৰু শ্ৰীভূমি।
আনহাতে ৭ মে’ত আন ১৩ খন জিলাত বন্ধ ঘোষণা কৰিছে। ৭ মে’ত এই কেইখন জিলাত পঞ্চায়ত নিৰ্বাচনৰ দ্বিতীয় পৰ্যায়ৰ ভোটগ্ৰহণ।
জিলা কেইখন হৈছে ধুবুৰী, দক্ষিণ শালমাৰা মানকাছাৰ, গোৱালপাৰা, বঙাইগাঁও, বৰপেটা, বজালি, নলবাৰী, কামৰূপ, কামৰূপ মহানগৰ, হোজাই, নগাঁও, মৰিগাঁও আৰু দৰং।
উল্লেখ্য যে, ৰাজ্যিক নিৰ্বাচন আয়ুক্তই জনোৱা অনুসৰি এইবাৰ পঞ্চায়ত নিৰ্বাচনত ১,৮০,৩৬,৬৮২ গৰাকী ভোটাৰে ভোটদান কৰিব। ইয়াৰে ৯০,৭১,২৬৪ গৰাকী পুৰুষ, ৮৯,৬৫,০১০ গৰাকী মহিলা আৰু ৪০৮ গৰাকী তৃতীয় লিংগৰ ভোটাৰ।
ইতিমধ্যে আজি অন্ত পৰিল মনোনয়ন পত্ৰ প্ৰদানৰ সময়। ১২ এপ্ৰিলত মনোনয়ন পত্ৰ পৰীক্ষণ কৰা হ’ব আৰু মননোয়ন প্ৰত্যাহাৰৰ অন্তিম দিন ১৭ এপ্ৰিল।
