যুদ্ধ বিধ্বস্ত পেলেষ্টাইনৰ গাজা চহৰত পুনৰ ইজৰাইলৰ আক্ৰমণ। এইবাৰ গাজাৰ দক্ষিণৰ চহৰ খান ইউনিছত বৃহস্পতিবাৰে একেৰাহে দ্বিতীয়টো নিশা ধাৰাবাহিক বিমান আক্ৰমণত ৫০ জনতকৈও অধিক লোকৰ মৃত্যু হোৱাৰ খবৰ আহিছে।
খান ইউনিছ চহৰস্থিত নাছৰ হাস্পতালৰ মৰ্গত শাৰি শাৰিকৈ মৃতদেহ ৰাখি থোৱা দৃশ্য সংবাদ মাধ্যমৰ জৰিয়তে পোহৰলৈ আহিছে। এই শিহৰণকাৰী দৃশ্য বন্দী হৈছে খান ইউনিছৰ এছ’চিয়েটেড প্ৰেছৰ এজন কেমেৰামেনে ৰেকৰ্ডিং কৰা ভিডিঅ’ত।
হাস্পতালখনৰ মৰ্গত ৮২ জন লোকৰ মৃতদেহ ৰখা বুলি নিশ্চিত কৰিছে হাস্পতাল কৰ্তৃপক্ষই।
ইফালে কাটাৰৰ টেলিভিছন নেটৱৰ্ক আল আৰবী টিভিৰ বাবে কাম কৰা এজন সাংবাদিকৰো মৃ্ত্যু হোৱা বুলি উল্লেখ কৰি নেটৱৰ্কটোৱে ছ’চিয়েল মিডিয়াত ঘোষণা কৰি কয় যে খান ইউনিছত সংঘটিত হোৱা আক্ৰমণত হাছান ছামুৰসহ পৰিয়ালৰ ১১ জন সদস্য নিহত হৈছে।
অৱশ্যে এই আক্ৰমণ সন্দৰ্ভত ইজৰাইল সেনাৰ তৰফৰ পৰা কোনো প্ৰতিক্ৰিয়া প্ৰকাশ কৰা নাই।
