নিষিদ্ধ মাংসক কেন্দ্ৰ কৰি উত্তপ্ত হৈ পৰিছে হোজাই। শনিবাৰে হোজাইৰ বৰপুখুৰীত পথৰ ওপৰত কোনো অচিনাক্ত দুৰ্বৃত্তই গো-মাংস পেলাই থৈ যোৱাক কেন্দ্ৰ কৰি স্থানীয় ৰাইজৰ মাজত ক্ষোভৰ উদগীৰণ হোৱা পৰিলক্ষিত হৈছে।
এই ঘটনাৰ পিছতে বৰপুখুৰীত স্থানীয় হিন্দু লোকসকলে পথ অৱৰোধ কৰি প্ৰতিবাদ সাব্যস্ত কৰাৰ বিপৰীতে ভূঞাপট্টিত মুছলমান লোকেও একেই পথ অৱলম্বন কৰি পৰিস্থিতি উত্তপ্ত কৰি তোলে।
উত্তেজনাময় পৰিৱেশৰ প্ৰতি লক্ষ্য ৰাখি পৰৱৰ্তী সময়ত আৰক্ষীৰ এটা দল ভূঞাপট্টিত উপস্থিত হৈ পৰিস্থিত নিয়ন্ত্ৰনৰ চেষ্টা চলায়। কিন্তু পৰিস্থিতি অধিক উত্তপ্ত হৈ পৰাত প্ৰতিবাদ নিয়ন্ত্ৰণ কৰিবলৈ আৰক্ষীয়ে লাঠি চার্জ কৰিবলৈ বাধ্য হয়।
বৰ্তমান হোজাই আৰু যোগিজান সংযোগী পথত চেপা উত্তেজনাময় পৰিৱেশে বিৰাজ কৰিছে। বৰ্তমান এই পথছোৱাত আৰক্ষীৰ লগতে অৰ্ধ সামৰিক বাহিনী মোতায়েন কৰা হয়।
আনহাতে বৰপুখুৰী অঞ্চলত এতিয়াও একাংশ পুৰুষ-মহিলাই পথ অৱৰোধ কৰি গো হত্যা বন্ধৰ দাবীত প্ৰতিবাদ অব্যাহত ৰাখিছে।
