ইৰাণ আৰু ইজৰাইলৰ যুদ্ধত প্ৰত্যক্ষ প্ৰৱেশ ঘটিল আমেৰিকাৰ। দীৰ্ঘদিনৰ হুংকাৰৰ পিছত এইবাৰ আমেৰিকাই ইৰাণৰ তিনিটাকৈ পাৰমাণৱিক ঘাটিত আক্ৰমণ সংঘটিত কৰিছে। আমেৰিকাই আক্ৰমণ কৰা স্থান কেইটা হৈছে ফোৰ্ডো, নন্তাজ আৰু এস্ফাহান।
ইৰাণৰ ওপৰত কৰা এই আক্ৰমণৰ সবিশেষ তথ্য সদৰি কৰি আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে আমি ইৰাণৰ তিনিটাকৈ পাৰমাণৱিক ঘাটিত সফলতাৰে আক্ৰমণ কৰিছো। আক্ৰমণ সংঘটিত কৰি প্ৰতিখন বিমান ইৰাণৰ পৰা উভতি আহিছে। এতিয়া শান্তিৰ সময়! ছ’চিয়েল প্লেটফৰ্ম ট্ৰুথৰ জৰিয়তে এই তথ্য প্ৰদান কৰে।
ইফালে কিছু সময় পিছতেই এই আক্ৰমণ সন্দৰ্ভত দেশবাসীক সম্বোধন কৰিব আমেৰিকাৰ ৰাষ্ট্ৰপতি ড’নাল্ড ট্ৰাম্পে।
আনহাতে ইৰাণৰ পাৰমাণৱিক ঘাটিত আমেৰিকাৰ আক্ৰমণৰ পিছত ইৰাণৰ চৰকাৰী টিভি (আই আৰ আই বি)ত এজন বিশেষজ্ঞই কয় যে এতিয়া এই অঞ্চলৰ প্ৰতিজন আমেৰিকান নাগৰিক আৰু জোৱান আমাৰ লক্ষ্য। বিশেষজ্ঞগৰাকীয়ে লগতে কয়, ‘আপোনালোকে আৰম্ভ কৰিছে, এতিয়া আমি শেষ কৰিম।’
উল্লেখ্য যে ইজৰাইল আৰু ইৰাণৰ মাজত আৰম্ভ হোৱা যুদ্ধই ধাৰণ কৰিছে ভয়াৱহ ৰূপ। ইৰাণে দাবী কৰা অনুসৰি যুদ্ধ আৰম্ভ হোৱাৰ পিছৰ পৰা এতিয়ালৈকে ৪০০ৰো অধিক লোক নিহত হৈছে।
