শুকুৰবাৰে ১৭ সংখ্যক উপ-ৰাষ্ট্ৰপতি নিৰ্বাচনৰ সময়সূচী ঘোষণা কৰে নিৰ্বাচন আয়োগে। সূচী অনুসৰি, অহা ৯ ছেপ্টেম্বৰত উপ-ৰাষ্ট্ৰপতিৰ নিৰ্বাচনৰ বাবে ভোটগ্ৰহণ অনুষ্ঠিত হ’ব।
নিৰ্বাচন আয়োগে প্ৰকাশ কৰা সূচী অনুসৰি ৭ আগষ্টত নিৰ্বাচনৰ বাবে অধিসূচনা জাৰি কৰা হ’ব। মনোনয়ন দাখিলৰ অন্তিম তাৰিখ ২১ আগষ্ট। ২২ আগষ্টত হ’ব মনোনয়ন পত্ৰৰ পৰীক্ষা। মনোনয়ন প্ৰত্যাহাৰৰ অন্তিম তাৰিখ ২৫ আগষ্ট।
নিৰ্বাচন আয়োগে প্ৰকাশ কৰা সূচী অনুসৰি, ৯ ছেপ্তেম্বৰৰ পুৱা ১০.০০ বজাৰ পৰা বিয়লি ৫.০০ বজাৰ ভিতৰত ভোটদান অনুষ্ঠিত হ’ব আৰু সেইদিনাই ফলাফল ঘোষণা কৰা হ’ব।
উল্লেখ্য যে, লোকসভা আৰু ৰাজ্যসভা উভয়ৰে সদস্যৰে গঠিত এখন নিৰ্বাচনী কলেজৰ দ্বাৰা উপ-ৰাষ্ট্ৰপতি নিৰ্বাচন কৰা হয়। অৰ্থাত উচ্চ সদনৰ ২৪৫ গৰাকী সদস্য আৰু নিম্ন সদনৰ ৫৪৩ গৰাকী সদস্যই উপ-ৰাষ্ট্ৰপতি নিৰ্বাচনত ভোটাধিকাৰ সাব্যস্ত কৰিব লাগে।
৭৮৮ জন সদস্যৰে গঠিত নিৰ্বাচনী কলেজত বৰ্তমান ৬ খন আসন খালী হৈ থকাৰ বাবে এইবাৰৰ উপ-ৰাষ্ট্ৰপতি নিৰ্বাচনত ৭৮২ জন সদস্যইহে ভোটাধিকাৰ সাব্যস্ত কৰিব।
স্মৰ্তব্য যে, ২১ জুলাইৰ নিশা উপ-ৰাষ্ট্ৰপতি জগদীপ ধনখড়ে চিকিৎসাজনিত কাৰণত ৰাষ্ট্ৰপতি দ্ৰৌপদী মুৰ্মুক পদত্যাগ পত্ৰ প্ৰদান কৰে। ধনখড়ৰ পদত্যাগৰ পিছৰে পৰা উপ-ৰাষ্ট্ৰপতিৰ আসনখন খালী হৈ আছে।
