নিজ জন্ম ভূমিলৈ উভতি আহিল আন্তঃৰাষ্ট্ৰীয় মহাকাশ কেন্দ্ৰ (ISS) লৈ যোৱা প্ৰথম ভাৰতীয় গ্ৰুপ কেপ্তেইন শুভাংশু শুক্লা। ১৫ জুলাইত মহকাশ কেন্দ্ৰৰ পৰা উভতি অহাৰ পিছত ১৭ আগষ্ট তথা দেওবাৰে পুৱা দিল্লীত আহি উপস্থিত হয় মহাকাশচাৰীগৰাকী।
দিল্লী বিমান বন্দৰত উপস্থিত হোৱাৰ লগে লগে হাজাৰ-হাজাৰ লোকে জাতীয় পতাকাৰ লগতে ঢোল-নাগাৰাৰে দেশৰ দ্বিতীয়গৰাকী মহাকাশচাৰীজনক আদৰণি জনায়। তেওঁক আদৰিবলৈ বিমান বন্দৰত উপস্থিত থাকে দিল্লীৰ মুখ্যমন্ত্ৰী ৰেখা গুপ্তা আৰু কেন্দ্ৰীয় মন্ত্ৰী জীতেন্দ্ৰ সিং।
উল্লেখ্য যে, ভাৰতীয় মহাকাশচাৰী শুভাংশু শুক্লাই ২৫ জুনত এক্সিয়াম মিছন ৪ৰ অধীনত ISS লৈ ৰাওনা হৈছিল। ইয়াৰ লগে লগে তেওঁ মহাকাশত ভৰি দিয়া প্ৰথমজন ভাৰতীয় হিচাপে পৰিগণিত হয়। মহাকাশত বিভিন্ন পৰীক্ষা-নিৰীক্ষা কৰি তেওঁ ২৫ জুলাইত পৃথিৱীত ভৰি দিছিল।
শুক্লাই বিগত এবছৰ ধৰি আমেৰিকাৰ নাছা, এক্সিয়াম আৰু স্পেচএক্সৰ সুবিধাসমূহত প্ৰশিক্ষণ লৈ আছিল।
ভাৰতলৈ উভতি অহাৰ সময়ত শুক্লাই ইনষ্টাগ্ৰামত এখন ছবি শ্বেয়াৰ কৰি লিখিছে যে তেওঁ মিশ্ৰিত আৱেগৰ মাজেৰে পাৰ হৈ গৈছে। তেওঁ লিখিছে, ‘আমেৰিকাত লগ পোৱা বন্ধু-বান্ধৱী আৰু পৰিয়ালক এৰি অহাটো দুখৰ কথা, কিন্তু ভাৰতলৈ উভতি আহি মোৰ পৰিয়াল আৰু দেশবাসীক লগ পোৱাটো আনন্দ আৰু সুখ। মোৰ কমাণ্ডাৰ পেগী হুইটছনে কোৱাৰ দৰে – মহাকাশ ভ্ৰমণত পৰিৱৰ্তন একমাত্ৰ স্থায়ী বস্তু, জীৱনতো একেই কথা।’
তেওঁ হিন্দী ছবি ‘স্বদেশ’ ‘ইউ হি চলা চল ৰহী’ গীতটোৰ পংক্তিৰে পোষ্টটোৰ সামৰণি মাৰে।
