৭০ বছৰ বয়সতো সুস্থ হৈ থাকিব আপোনাৰ হৃদযন্ত্ৰ! মাত্ৰ অৱলম্বন কৰক এই ৫ উপায়

বয়স মাথোঁ এটা সংখ্যা বুলি কোৱা হয়। যদি হৃদযন্ত্ৰ সুস্থ হয়, তেন্তে ৭০ বছৰ বয়সতো এজন ব্যক্তিয়ে ৪০ বছৰ বয়সৰ দৰেই শক্তিশালী অনুভৱ কৰে। কিন্তু বাস্তৱ কথাটো হ’ল বয়স বৃদ্ধিৰ লগে লগে হৃদযন্ত্ৰৰ স্বাস্থ্যৰ প্ৰতি অসাৱধানতা বিপদজনক হ’ব পাৰে। ৰক্তচাপ, চেনি, মেদবহুলতা, মানসিক চাপ আৰু ভুল খাদ্যাভ্যাসে হৃদৰোগৰ আমন্ত্ৰণ জনায়।

বিশেষজ্ঞই উল্লেখ কৰা ৫ টা টিপছ জানো আহক, যি গ্ৰহণ কৰি আমি বৃদ্ধ বয়সতো হৃদযন্ত্ৰক ফিট আৰু সুস্থ কৰি ৰাখিব পাৰো-

• দৈনিক লঘু ব্যায়াম

বয়স যিয়েই নহওক কিয়, শৰীৰ সক্ৰিয় কৰি ৰখাটো গুৰুত্বপূৰ্ণ। ৭০ বছৰ বয়সতো খোজ কঢ়া, যোগাসন, প্ৰাণায়াম, ষ্ট্ৰেচিং বা ঘৰৰ সৰু সৰু কাম কৰা আদি লঘু ব্যায়ামে হৃদয় শক্তিশালী কৰে। ইয়াৰ ফলত ৰক্ত সঞ্চালন উন্নত হয়, হৃদযন্ত্ৰৰ পেশীবোৰ শক্তিশালী হৈ থাকে আৰু শৰীৰত অপ্ৰয়োজনীয় চৰ্বি জমা নহয়।

• সুষম আৰু লঘু খাদ্য গ্ৰহণ

বয়স বৃদ্ধিৰ লগে লগে পাচন শক্তি দুৰ্বল হৈ পৰে, গতিকে সদায় লঘু আৰু সহজে হজম হোৱা খাদ্য গ্ৰহণ কৰা উচিত। খাদ্যত সেউজীয়া শাক-পাচলি, বতৰৰ ফল-মূল, দালি, চালাড, অটছ আৰু বাদাম অন্তৰ্ভুক্ত কৰিব লাগে। তেলীয়া আৰু টেঙা খাদ্যৰ পৰা আঁতৰি থাকিব লাগে। লগতে নিমখ আৰু চেনি সীমিত পৰিমাণে সেৱন কৰিব লাগে। ইয়াৰ ফলত ৰক্তচাপ আৰু চেনিৰ মাত্ৰা নিয়ন্ত্ৰণত থাকে, যাৰ ফলত হৃদৰোগ প্ৰতিৰোধ হয়।

• মানসিক চাপৰ পৰা আঁতৰি থাকিব লাগে

মানসিক চাপ হৃদৰোগৰ আটাইতকৈ ডাঙৰ কাৰণ। অলপ চিন্তাই হৃদস্পন্দন অস্বাভাৱিক কৰি তুলিব পাৰে। গতিকে এই বয়সত মানসিক শান্তি অতি গুৰুত্বপূৰ্ণ। ধ্যান, ভাল সংগীত শুনা, পৰিয়াল আৰু বন্ধু-বান্ধৱীৰ সৈতে সময় কটোৱা উচিত। গতিকে মানসিক চাপৰ পৰা ৰক্ষা পাবলৈ হাঁহি আৰু ইতিবাচক চিন্তাধাৰা বজাই ৰখাটোৱেই হৃদযন্ত্ৰক দীৰ্ঘদিনলৈ সুস্থ কৰি ৰখাৰ মূল চাবিকাঠি।

• টোপনিক অগ্ৰাধিকাৰ

ভাল টোপনি কেৱল মগজুৰ বাবেই নহয় হৃদযন্ত্ৰৰ বাবেও গুৰুত্বপূৰ্ণ। বয়স বাঢ়ি অহাৰ লগে লগে বহুতে পৰ্যাপ্ত টোপনি নাপায় যদিও কমেও ৬-৭ ঘন্টা গভীৰ টোপনি থকাটো জৰুৰী। টোপনিয়ে শৰীৰ শিথিল কৰে, ৰক্তচাপ স্বাভাৱিক হৈ থাকে আৰু হৃদযন্ত্ৰৰ ওপৰত কোনো অতিৰিক্ত চাপ নাথাকে।

• নিয়মীয়াকৈ স্বাস্থ্য পৰীক্ষা কৰক

৭০ বছৰ বয়সত হৃদযন্ত্ৰ সুস্থ কৰি ৰখাৰ আটাইতকৈ সহজ উপায় হ’ল নিয়মীয়াকৈ পৰীক্ষা কৰা। ইচিজি, ৰক্তচাপ, চেনিৰ মাত্ৰা আৰু কলেষ্টেৰল পৰীক্ষা কৰি থাকিব। ইয়াৰ দ্বাৰা যিকোনো সমস্যা সময়মতে ধৰা পেলোৱাত সহায় হয় আৰু ৰোগ হোৱাৰ আগতেই চিকিৎসা কৰিব পৰা যায়।